ప్రెస్ మీట్ పెట్టి తన వైఫల్యాన్ని చెప్పుకున్న సీఎం

రేవంత్ రెడ్డి అవగాహన రాహిత్యంతోనే ఈ దుస్థితి

రైతు కూలీలకు ఏడాదికి రూ. 12 వేలు ఇవ్వడంతో పాటు ఇన్సూరెన్స్ చేయించాలి

రాష్ట్రం కరవులో ఉంటే సీఎం యాదాద్రి పవర్ ప్లాంట్ ను ప్రైవేటీకరించే ప్రయత్నం చేస్తున్నడు

పవర్ మ్యాక్స్ కంపెనీతో ఉన్న ఒప్పందం ఏమిటో బయట పెట్టాలి

-తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణ సేన, హైదరాబాద్) :

ఎల్ నినోతో కరవు వస్తుందని శాస్త్రవేత్తలు ముందే హెచ్చరించినా ముందస్తు చర్యలు చేపట్టడంలో సీఎం రేవంత్ రెడ్డి అట్టర్ ఫ్లాప్ అయ్యారని తెలంగాణ రక్షణ సేన చీఫ్ కల్వకుంట్ల కవిత మండిపడ్డారు. శుక్రవారం బంజారాహిల్స్ లోని తెలంగాణ రక్షణసేన కార్యాలయంలో ఆమె మీడియాతో మాట్లాడారు. ఈ ఏడాది జనవరి నుంచే ఎల్ నినో ఎఫెక్ట్ తో తీవ్రమైన కరవు వచ్చే ప్రమాదముందని హెచ్చరించినా కనీస చర్యలు చేపట్టలేదన్నారు. దొంగలు పడిన ఆరు నెలలకు ఏమో అన్నట్లుగా ఇప్పుడొచ్చి రైతులు త్యాగాలు చేయాలని నీతులు వల్లించడం సిగ్గుచేటు అన్నారు. కరవు విషయంలో తాను ఏమీ చేయలేనని సీఎం రేవంత్ రెడ్డి నిస్సహాయతను వ్యక్తం చేస్తూ చేతులెత్తేశారని మండిపడ్డారు. పాలకుడికి దూరదృష్టి ఉండాలని.. సీఎంలో అది లోపించిందని అన్నారు. పరిస్థితి మొత్తం చేయి దాటి పోయిన తర్వాత  వచ్చి రైతులు త్యాగాలు చేయాలని మాట్లాడటం దారుణమన్నారు. ఆగస్టులో 28 శాతం లోటు వర్షపాతం నమోదు అయ్యిందని.. అప్పుడే అప్రమత్తమై ఉంటే పరిస్థితి వేరేలా ఉండేదన్నారు. పక్క రాష్ట్రాలు కరవు మండలాలను ప్రకటించి కేంద్రానికి ఇప్పటికే నివేదిక పంపాయని గుర్తు చేశారు. తెలంగాణ సీఎం మాత్రం నిర్లక్ష్యంగా వ్యవహరించి ఇప్పుడు నింపాదిగా రివ్యూలు అంటూ కాలం వెళ్లదీసే ప్రయత్నాలు చేస్తున్నారని ఆగ్రహం వ్యక్తం చేశారు.

ప్రభుత్వం, ముఖ్యమంత్రి ముందే మేల్కొని ముందస్తుగా చర్యలు చేపట్టి ప్రజలకు ఇబ్బందులు తప్పేవన్నారు. మన ముఖ్యమంత్రికి ప్రజల మీద శ్రద్ధ, సమస్యల మీద ఫోకస్ లేదని ధ్వజమెత్తారు. రేవంత్ రెడ్డి అధికారంలోకి వచ్చి దాదాపు మూడేళ్లు అవుతుందని.. ఇప్పటి వరకు పాలమూరు-రంగారెడ్డి పూర్తి చేయలేదని, మేడిగడ్డ బ్యారేజ్ ను కూడా రిపేర్ చేయలేదని అన్నారు. వాటిని పూర్తి చేసి ఉంటే ఇవ్వాళ రాష్ట్రానికి ఈ పరిస్థితి వచ్చేది కాదన్నారు. గత బీఆర్ఎస్ ప్రభుత్వం రూ.1.86 లక్షల కోట్లు ఖర్చు చేసినా ప్రాజెక్టులు పూర్తి కాలేదని, కాంగ్రెస్ ప్రభుత్వం అధికారంలోకి వచ్చాక రూ. 26 వేల కోట్లు ఖర్చు చేసినప్పటికీ ఒక్క ఎకరానికి కూడా కొత్తగా నీళ్లు ఇవ్వలేదన్నారు. మేడిగడ్డ బ్యారేజ్ రిపేర్లు చేసుకోవడానికి ఇదే సరైన సమయమని.. వచ్చే వర్షాకాలంలోగా ఆ పనులు పూర్తి గోదావరి నీళ్లను వినియోగంలోకి తేవాలని డిమాండ్ చేశారు. ఇంకా ఎన్నాళ్లు గత ప్రభుత్వాన్ని తిడుతూ టైమ్ చేస్తారని ప్రశ్నించారు. తిట్టుడు బంద్ చేసి కట్టుడు షురూ చేయాలని సూచించారు. బీఆర్ఎస్ ప్రభుత్వం ఒక్క ఏడాదికి కృష్ణా నీళ్ల ఒప్పందం కుదుర్చుకుంటే ఆ వంకతో తెలంగాణ ప్రయోజనాలను దెబ్బ తీసే విధంగా ఏపీకి కృష్ణా నీటి ధారాదత్తం చేస్తున్నారని ఆవేదన వ్యక్తం చేశారు. పాలమూరు బిడ్డ అయి ఉండి కనీసం భీమా, నెట్టంపాడు ప్రాజెక్ట్ లను కూడా పూర్తి చేయకపోవటం అన్యాయమన్నారు. బీఆర్ఎస్ తప్పులను ఎత్తి చూపి అధికారంలోకి వచ్చిన రేవంత్ రెడ్డి ఇప్పుడు అవే తప్పులు చేస్తున్నారని ఆగ్రహం వ్యక్తం చేశారు. 

రాష్ట్రానికి శాపంగా సీఎం అనుభవ లేమి

సీఎం రేవంత్ రెడ్డి అనుభవలేమి రాష్ట్రానికి శాపంగా మారిందని మండిపడ్డారు. నీళ్ల విషయంలో, కరవును ఎదుర్కొనే విషయంలో సీఎం ఏమాత్రం ముందు చూపుతో వ్యవహరించలేదన్నారు. రైతులను త్యాగాలు చేయాలంటున్న ముఖ్యమంత్రి వారికి పరిహారం ఏం ఇస్తారో మాత్రం చెప్పడం లేదన్నారు. పంట నష్టపోయిన వారికి ఎకరానికి రూ.10 వేలు ఇస్తామని లీకులు ఇస్తున్నారే తప్ప ముఖ్యమంత్రి స్పష్టమైన ప్రకటన చేయడం లేదన్నారు. యాసంగిలో పంటలు సాగు చేయకపోతే రైతు కూలీలు ఆగమయ్యే పరిస్థితి ఉంటుందని ఆందోళన వ్యక్తం చేశారు. కూలీలే కాదు, రైతులు సైతం పనులు లేక పట్ణణాలకు వలస వెళ్లే పరిస్థితి ఉందని.. పట్టణాల్లో సరైన ఉపాధి అవకాశాలు లేవన్నారు. రైతు కూలీలకు ఏడాదికి రూ.12 వేలు ఇవ్వడంతో పాటు వారి కుటుంబాలకు బీమా సౌకర్యం కల్పించాలని డిమాండ్ చేశారు. రైతు కూలీలకు ఏమైనా అయితే వారి కుటుంబాలకు ఆగమవుతాయని అన్నారు. స్థానికంగా ఉపాధి లేక జోగులాంబ గద్వాల జిల్లా అయిజ మండలానికి చెందిన 20 మంది కూలీలు పనికోసం కర్ణాటక వెళ్తుండగా ప్రమాదం జరిగి ఇద్దరు చనిపోయారని చెప్పారు. వారి కుటుంబాలకు ఆధారం లేకుండా పోయిందన్నారు. ఉపాధి హామీ పథకంలో రైతు కూలీలకు పని కల్పిస్తామని చెప్తున్నప్పటికీ కేంద్రంతో మాట్లాడకుండా అది ఎలా సాధ్యమని ప్రశ్నించారు. ఉపాధి హామీలో పని దినాలు పెంచడం కోసం ఇప్పుడు కమిటీ వేస్తే ఎప్పుడు కేంద్రానికి నివేదిక ఇస్తారని.. వాళ్లు ఎప్పుడు ఆమోదిస్తారని ప్రశ్నించారు.

యాదాద్రి పవర్ ప్లాంట్ ప్రైవేటీకరణకు కుట్ర

రాష్ట్రం ఇంత సంక్షోభం ఉంటే సీఎం తన కుటుంబానికి సంపదను దోచేపెట్టే పనిలో ఉన్నారని కవిత మండిపడ్డారు. యాదాద్రి పవర్ ప్లాంట్ లో కొన్ని కాంపొనెంట్లను ప్రైవేటీకరించి దోచుకునేందుకు కుట్ర చేస్తున్నారన్నారు. పవర్ మ్యాక్స్ అనే కంపెనీతో ముఖ్యమంత్రికి ఉన్న సంబంధాన్ని బయట పెట్టాలని డిమాండ్ చేశారు. కరెంట్ విషయంలో ప్రభుత్వానికి అధికారం ఉండాలని గతంలో మాట్లాడిన సీఎం.. ఇప్పుడు ప్రైవేటీకరణకు ఎందుకు ప్రయత్నిస్తున్నారని ప్రశ్నించారు. రైతులకు నీళ్లు, కరెంట్ ఇవ్వగలిగే పరిస్థితి ఉన్నప్పటికీ కాంగ్రెస్ ప్రభుత్వం ఇవ్వడం లేదని.. ఈ విషయాన్ని రైతులు గమనించాలని కోరారు. రాష్ట్రంలో కరెంట్ సంక్షోభం ఉంటుందని ముందే గ్రహించి తాము ప్రభుత్వాన్ని ఎప్పటికప్పుడు హెచ్చరిస్తూనే ఉన్నామని గుర్తు చేశారు. సర్ ప్లస్ కరెంట్ ఉన్న రాష్ట్రాలతో ముందే ఒప్పందం కుదుర్చుకొని ఉంటే కరెంట్ సమస్య వచ్చేది కాదన్నారు. అడుక్కుంటారో, కొనుక్కుంటారో గానీ నవంబర్ నెలాఖరు  వరకు రైతులకు ఉచిత కరెంట్ ఇవ్వాల్సిందేనని స్పష్టం చేశారు. లేదంటే బోర్లపై ఆధారపడిన రైతులు తీవ్రంగా నష్టపోయే ప్రమాదం ఉందన్నారు. కరెంట్ కష్టాలను అధిగమించేందుకు అవసరమైతే కేంద్ర మంత్రులు కిషన్ రెడ్డి, బండి సంజయ్ లను కలుస్తామని.. ఢిల్లీకి వెళ్లి కేంద్రం పెద్దలతో మాట్లాడతామని చెప్పారు. 

హైదరాబాద్ నీటి కష్టాలకు కాంగ్రెస్సే కారణం

హైదరాబాద్ లో నీటి కొరతకు కాంగ్రెస్ ప్రభుత్వమే కారణమని కవిత చెప్పారు. ఎల్ నినో ఎఫెక్ట్ తో పాటు నగరంలో పెద్ద ఎత్తున చెరువులు కబ్జా చేయటంతో నీళ్ల కష్టాలు వచ్చాయన్నారు. కాంగ్రెస్ ప్రభుత్వం అధికారంలోకి వచ్చిన తర్వాత 8 వేల చెరువులు మాయం చేశారని చెప్పారు. దీంతో నగరంలో భూగర్భ జలాలు అడుగంటాయని తెలిపారు. చెరువులను కాపాడాల్సిన హైడ్రా ఏం చేస్తుందని నిలదీశారు. కరువు బారిన పడిన రాష్ట్రాన్ని వదిలేసి తన కుటుంబానికి దోచి పెట్టేందుకు ముఖ్యమంత్రి రోజు అన్నదమ్ములతో మీటింగ్ పెడుతున్నారని ఆగ్రహం వ్యక్తం చేశారు. కుటుంబ దోపిడీకి కేటాయించిన సమయంలో కొంత రాష్ట్ర ప్రజల కోసం కేటాయించి ఉంటే ఈ కష్టాలు వచ్చేవి కావన్నారు. 

అఖిలపక్షం ఇప్పుడు గుర్తొచ్చిందా?

కరవును ఎదుర్కొనే విషయంలో పూర్తి నిర్లక్ష్యంగా వ్యవహరించిన ముఖ్యమంత్రి ఇప్పుడు మొసలి కన్నీరు కారుస్తున్నారని కవిత అన్నారు. కరువు విషయంలో అఖిలపక్ష మీటింగ్ పెడతామని అంటున్నారని కానీ దానితో ప్రయోజనం ఏముంటుందని ప్రశ్నించారు. ఈ పని ముందే చేయాల్సిందని అన్నారు. బీసీ బిల్లు విషయంలో అఖిలపక్షాన్ని ఢిల్లీకి ఎందుకు తీసుకెళ్లలేదని నిలదీశారు. అవసరమైన విషయాల్లో సైలెంట్ గా ఉండి ఇప్పుడు తాను చేసిన తప్పుకు అందరినీ భాగస్వాములు చేసే ప్రయత్నం చేస్తున్నారని మండిపడ్డారు. ఇప్పుడు అఖిలపక్షం గుర్తొచ్చిందా అంటూ మండిపడ్డారు. కవులు, కళాకారులు, ప్రతిపక్షాలు, సినిమా స్టార్లను కరవు విషయంలో ప్రభుత్వానికి అండగా నిలవాలని కోరుతున్నారని.. కానీ గతంలో వారిని ఇబ్బంది పెట్టిన సంగతి ఏమిటని ప్రశ్నించారు. కష్ట కాలంలో రైతులకు తాము అండగా ఉంటామని, వారికి తమ తరఫున చేయగలిగిన సాయం చేస్తారని చెప్పారు. అదే సమయంలో ఈ ప్రభుత్వం చేతగాని తనం కారణంగా వచ్చిన కరువు ముప్పును కూడా ప్రజలకు వివరిస్తామన్నారు. 

సొంత మనుషులపై ఉడుకు నీళ్లు పోసే నైజం కేటీఆర్ ది

విదేశీ బొగ్గు కొనుగోలు ఒప్పందాలపై విచారణ పేరుతో ప్రతిమ శ్రీనివాస్ రావుకు వ్యతిరేకంగా కేటీఆర్ లేఖ రాయడంపై కవిత ఆశ్చర్యం వ్యక్తం చేశారు. ఉద్యమకాలంలో బీఆర్ఎస్ కు పూర్తి అండగా ఉన్న శ్రీనివాస్ రావుపై విచారణ కోరడం అంటే నమ్మినోళ్లను నట్టేట ముంచడమేనన్నారు. సాయం చేసిన వాళ్లను, కుల బంధువులను ఇబ్బంది పెట్టడం.. ఇంటి మనిషినైనా తనను కిరాయి మనుషులతో తిట్టించే నైజం కేటీఆర్ ది అని మండిపడ్డారు. తెలిసి చేశాడో తెలియక చేశాడో గానీ లేఖ రాయడం ఆయన అజ్ఞానాన్ని తెలియజేస్తుందన్నారు. తెలియక చేసి ఉంటే ఆయనకు ఏమీ తెలియదని తాను చెప్పే మాటలు నిజమని.. తెలిసి చేసి ఉంటే అదే కేటీఆర్ నైజమని అన్నారు. సొంత మనుషులపై ఉడుకు నీళ్లు పోసే వ్యక్తి కేటీఆర్ అన్నారు. ప్రతిమ శ్రీనివాస్ ను సీఎం ఎందుకు కాపాడుతున్నాడని ప్రశ్నించారు. తప్పు చేస్తే ఎవరినైనా శిక్షించాలని కానీ సాయం చేసిన వాళ్లపైనే విచారణ కోరుతూ లేఖలు రాయడమే కేటీఆర్ వ్యక్తిత్వమన్నారు. సింగరేణి కార్మికుల కష్టాలేవి కేటీఆర్ కు తెలియదన్నారు. సింగరేణిలో బీఆర్ఎస్ సభ పెట్టి బల ప్రదర్శన చేయడానికి ప్రయత్నించారు తప్ప కార్మికుల కష్టాలను కనీసం ప్రస్తావించలేదన్నారు. తమ పోరాటాలతోనే ప్రభుత్వం దిగి వచ్చి సింగరేణిలో మెడికల్ బోర్డు నిర్వహిస్తుందని గుర్తు చేశారు. కార్మికుల కోసం పనిచేస్తున్న హెచ్ఎంఎస్, టీఆర్ఎస్ కూటమే సింగరేణి ఎన్నికల్లో విజయం సాధిస్తుందని ధీమా వ్యక్తం చేశారు.

The post Kalvakuntla Kavitha Slams Revanth Reddy Over Telangana Drought appeared first on Telangana Jagruthi.

నోటిఫికేషన్లలో దీన్ని విస్మరించారు

ప్రభుత్వ నిర్లక్ష్యానికి 400 మంది ఎస్టీకి అన్యాయం

వెంటనే నోటిఫికేషన్ మార్చకుంటే ప్రభుత్వంపై పోరాటం తప్పదు

-తెలంగాణ రక్షణసేన చీఫ్ కల్వకుంట్ల కవిత

(తెలంగాణ రక్షణసేన, హైదరాబాద్) :

ఏజెన్సీ ప్రాంతాల్లోని కానిస్టేబుల్ ఉద్యోగాల్లో ఎస్టీలకు దక్కాల్సిన 75 శాతం రిజర్వేషన్లను కచ్చితంగా అమలు చేయాల్సిందేనని తెలంగాణ రక్షణ సేన చీఫ్ కల్వకుంట్ల కవిత డిమాండ్ చేశారు. ఈ ఏడాది పోలీస్ రిక్రూట్మెంట్ బోర్డు విడుదల చేసిన నోటిఫికేషన్‌లో ఏజెన్సీ ప్రాంతాల ఎస్టీ రిజర్వేషన్లను పూర్తిగా విస్మరించారని చెప్పారు. ఇది ఎస్టీలకు కాంగ్రెస్ ప్రభుత్వం చేస్తున్న అన్యాయమంటూ మంగళవారం ఎక్స్ లో ఆమె పోస్ట్ చేశారు. ఉమ్మడి రాష్ట్రం ఉన్నప్పుడు 1988లో జారీ చేసిన జీవో 109తో పాటు, తెలంగాణ ఏర్పడిన తర్వాత  2018లో ప్రభుత్వం విడుదల చేసిన గెజిట్ నోటిఫికేషన్ 49 ప్రకారం ఏజెన్సీ ఏరియా కానిస్టేబుల్ పోస్టుల్లో ఎస్టీలకు 75 శాతం రిజర్వేషన్లు కల్పించడం చట్టబద్ధంగా తప్పనిసరంటూ గుర్తు చేశారు. తెలంగాణ ఏర్పడిన తర్వాత వచ్చిన 2015, 2018, 2022 కానిస్టేబుల్ నియామక నోటిఫికేషన్లలో ఈ రిజర్వేషన్లను యథావిధిగా అమలు చేశారన్నారు. కానీ ఈ ఏడాది పోలీస్ రిక్రూట్మెంట్ బోర్డు విడుదల చేసిన తాజా నోటిఫికేషన్‌లో ఏజెన్సీ ప్రాంతాల ఎస్టీ రిజర్వేషన్లను విస్మరించారని మండిపడ్డారు.

ఎస్టీ యువత 400 ఉద్యోగాలు కోల్పోతారు

పోలీస్ రిక్రూట్ మెంట్ బోర్డు తీసుకున్న ఈ నిర్ణయం కారణంగా రాష్ట్రంలోని ఆదిలాబాద్, ఆసిఫాబాద్, మంచిర్యాల, నాగర్ కర్నూలు, భద్రాద్రి కొత్తగూడెం, ములుగు, జయశంకర్ భూపాలపల్లి, వరంగల్, ఖమ్మం, మహబూబాబాద్ జిల్లాలకు చెందిన ఆదివాసీ, గిరిజన యువత తీవ్రంగా నష్టపోతారని కవిత చెప్పారు. అర్హులైన నిరుద్యోగులు దాదాపు 400కు పైగా కానిస్టేబుల్ ఉద్యోగాలను కోల్పోయే ప్రమాదం ఉంటుందన్నారు. గత నోటిఫికేషన్లలో ఇచ్చిన హక్కును ఈ నోటిఫికేషన్‌లో తొలగించడమంటే గిరిజనుల రాజ్యాంగబద్ధ హక్కులను హరించడమే అవుతుందన్నారు. ఈ విషయంపై హోంమంత్రిగానూ బాధ్యతలు నిర్వహిస్తున్న ముఖ్యమంత్రి  తక్షణమే స్పందించాలని డిమాండ్ చేశారు. ఏజెన్సీ ప్రాంత గిరిజన యువతకు న్యాయం జరిగేలా కానిస్టేబుల్ నియామక నోటిఫికేషన్‌లోమార్పులు చేయాలని కోరారు. ఏజెన్సీ ప్రాంతాల్లో కానిస్టేబుల్ ఉద్యోగాల్లో ఎస్టీలకు దక్కాల్సిన 75 శాతం రిజర్వేషన్ల నిబంధనను పునరుద్ధరించాల్సిందేనని ప్రభుత్వాన్ని కోరారు. లేదంటే ఎస్టీ యువత కలిసి ప్రభుత్వంపై పోరాటం చేస్తామని హెచ్చరించారు.

The post Telangana Constable Recruitment 2026: Kalvakuntla Kavitha Demands 75% ST Quota appeared first on Telangana Jagruthi.

మహిళా నాయకులతో కలిసి బతుకమ్మ పేర్చి, ఆడిన పార్టీ చీఫ్ కల్వకుంట్ల కవిత

మహిళలు, బహుజనుల కోసం పని చేసే తనను ఆశీర్వదించాలని పిలుపు

రిజర్వేషన్లతో సంబంధం లేకుండా మహిళలకు 50 శాతం సీట్లిస్తానని వెల్లడి

(తెలంగాణ రక్షణ సేన, హైదరాబాద్) :

తెలంగాణ అస్తిత్వ పతాక బతుకమ్మ వేడుకలు బంజారాహిల్స్ లోని తెలంగాణ రక్షణ సేన కార్యాలయంలో సోమవారం అట్టహాసంగా నిర్వహించారు. పార్టీ చీఫ్ కల్వకుంట్ల కవిత మహిళా నాయకులతో కలిసి బతుకమ్మ పేర్చారు. బతుకమ్మ పాటలు పాడుతూ అందరితో పాటలు పాడిస్తూ బతుకమ్మలు పేర్చారు. ఈ సందర్భంగా బతుకమ్మ విశిష్టత, తెలంగాణ ప్రత్యేక రాష్ట్ర సాధన ఉద్యమంలో ఈ పండుగ ద్వారా మహిళలను ఒక్కతాటిపైకి తీసుకురావడానికి ఎంతలా కృషి చేశామో వివరించారు. అనంతరం గౌరమ్మకు పూజలు చేసి మహిళా నాయకులతో కలిసి బతుకమ్మ ఆడారు. బతుకమ్మ వేడుకలతో తెలంగాణ రక్షణ సేన కార్యాలయంలో సందడిగా మారింది. తెలంగాణ సంస్కృతి, సంప్రదాయాలు ఉట్టి పడేలా బతుకమ్మ సంబురాలు నిర్వహించారు.

రిజర్వేషన్లతో సంబంధం లేకుండా మహిళలకు 50 శాతం రిజర్వేషన్లు

మహిళలు, బహుజనుల కోసం పాటు పడుతున్న తనను ఆశీర్వదించాలని రాష్ట్ర ప్రజలకు కవిత విజ్ఞప్తి చేశారు. బతుకమ్మ సంబురాల సందర్భంగా ఆమె మీడియాతో మాట్లాడారు. మహిళా నాయకత్వాన్ని పెంపొందించడానికి తాను కృషి చేస్తున్నానని తెలిపారు. ఇతర రాజకీయ పార్టీలు ఎలా ఉన్నా.. రిజర్వేషన్లు అమలు చేసినా, చేయకున్నా తమ పార్టీ రిజర్వేషన్లతో సంబంధం లేకుండా 50 శాతం సీట్లను మహిళలకు ఇస్తుందని ప్రకటించారు. రాజకీయ పార్టీ ఏర్పాటు చేసిన తర్వాత పార్టీ ఆఫీస్ లో బతుకమ్మ సంబురాలు నిర్వహించడం ఎంతో సంతోషంగా ఉందన్నారు.

ప్రపంచంలో ఎవరికీ లేని అత్యంత విశిష్టమైన బతుకమ్మ పండుగ మన తెలంగాణ సొంతమని అన్నారు. ప్రపంచానికి చాటేలా ఈ పండుగను జరుపుకుందామని పిలుపునిచ్చారు. ప్రతి ఒక్కరూ బతుకమ్మ పాటలు నేర్చుకొని భవిష్యత్ తరాలకు అందజేయాలని సూచించారు. బతుకమ్మ పండుగ అంటే తనకు ఎంతో ఇష్టమని తెలిపారు. ఆరోజు తెలంగాణ ఉద్యమ స్ఫూర్తికి బతుకమ్మ ప్రతీకగా నిలిచిందని గుర్తు చేశారు. గౌరమ్మ తల్లి ఆశీర్వాదంతో తెలంగాణ ఆడబిడ్డలందరూ ఆనందంగా ఉండాలని ఆకాంక్షించారు.

The post Bathukamma 2026: Kalvakuntla Kavitha Announces 50% Seats for Women appeared first on Telangana Jagruthi.

‎ -తెలంగాణ జాగృతి ఫౌండర్, తెలంగాణ రక్షణ సేన చీఫ్ కల్వకుంట్ల కవిత

భాషా మాధుర్యాన్ని భవిష్యత్ తరాలకు అందించే కృషి గొప్పది- అనన్య నాగళ్ల

‘సరస్వతీరాజ్-హరిదా అంతర్జాతీయ ఉత్తమ తెలంగాణ కథా పురస్కారం – 2026’ పోటీల పోస్టర్ ఆవిష్కరణ

(తెలంగాణ రక్షణసేన, హైదరాబాద్) :

‎తెలంగాణ భాష జీవభాష అని, తెలంగాణ భాషలో వచ్చిన సాహిత్యం పండిత పామరులను ఒకే విధంగా ఆనందింపజేస్తుందని తెలంగాణ జాగృతి వ్యవస్థాపక అధ్యక్షురాలు, తెలంగాణ రక్షణ సేన చీఫ్ కల్వకుంట్ల కవిత అన్నారు. ఆ మాధుర్యాన్ని తరతరాలకు అందించే విధంగా హరిదా రచయితల సంఘం చేస్తున్న కృషి అభినందనీయమని చెప్పారు. శనివారం బంజారాహిల్స్ లోని జాగృతి  కార్యాలయంలో ఏర్పాటు చేసిన ‘సరస్వతీరాజ్ – హరిదా అంతర్జాతీయ ఉత్తమ తెలంగాణ కథా పురస్కారం – 2026’ పోటీలకు సంబంధించిన వాల్ పోస్టర్ ను ఆమె ఆవిష్కరించారు. ఈ సందర్భంగా మాట్లాడుతూ తెలంగాణ భాషలోని సోయగాన్ని, పదబంధాలను, నుడికారాలను, సామెతలను కథల ద్వారా ముందు తరాలకు అందించడం మంచి ప్రయత్నమన్నారు. అంతర్జాతీయ స్థాయిలో తెలంగాణ భాషలో కథల పోటీ నిర్వహించడం ఆదర్శనీయమని, తెలంగాణ భాషలో కథను రాయగలిగిన రచయితలందరికీ ఇదొక గొప్ప అవకాశమన్నారు. ఈ అవకాశాన్ని అందరూ వినియోగించుకోవాలని కోరారు. 

భాష గొప్పతనం కథల ద్వారే తెలుస్తుంది- అనన్య నాగళ్ల

ఏ భాష గొప్పతనమైనా కథల ద్వారానే తెలుస్తుందని సినీ నటి అనన్య నాగళ్ల అన్నారు. కథలు ఆ ప్రాంతం భాష, సంస్కృతులను భవిష్యత్  తరాలకు అందజేసేందుకు సరైన సాధనాలని చెప్పారు. హరిదా రచయిత సంఘం కథ పోటీల ద్వారా రచయితల్లో ఉన్న ప్రతిభను వెలికితీసేందుకు ఎంతో మంచి ప్రయత్నం చేస్తున్నదన్నారు. ఈ కార్యక్రమాన్ని రచయితలంతా తప్పకుండా వినియోగించుకోవాలని కోరారు. 

తెలంగాణ భాష, సంస్కృతి వైభవాన్ని చాటేందుకే- ఘనపురం దేవేందర్

తెలంగాణ భాష, సంస్కృతుల వైభవాన్ని భవిష్యత్ తరాలకు అందించే ఉద్దేశంతోనే ఈ అంతర్జాతీయ స్థాయి కథల పోటీలను నిర్వహిస్తున్నామని హరిదా రచయితల సంఘం అధ్యక్షులు ఘనపురం దేవేందర్ తెలిపారు. ప్రపంచవ్యాప్తంగా తెలంగాణ భాషలో కథలు రాసే రచయితలందరూ ఇందులో భాగస్వాములు కావాలని పిలుపునిచ్చారు. ఈ కథల పోటీల నిబంధనలను వివరిస్తూ… తెలంగాణ ఆత్మ, జీవితం, సంస్కృతి, భాష, జీవన విధాన వైభవాన్ని చాటిచెప్పే ఏదైనా అంశాన్ని ఇతివృత్తంగా తీసుకుని కథను తెలంగాణ భాషలోనే రాయాలని వివరించారు. కథలో తెలంగాణతనం తప్పనిసరిగా ప్రతిబింబించాలని, ఎక్కడా ప్రచురితం కాని, సామాజిక మాధ్యమాల్లో పోస్ట్ చేయని, ఇతర పోటీలకు పంపని సరికొత్త కథలను మాత్రమే పంపాలని స్పష్టం చేశారు. రచన అనువాదం, అనుకరణ లేదా అనుసరణ కాకూడదని పేర్కొన్నారు. కథలను అక్షర దోషాలు లేకుండా యూనికోడ్ (Unicode) 14 సైజు ఫాంట్‌లో టైప్ చేసి, ఏ4 సైజులో గరిష్ఠంగా ఎనిమిది పేజీలకు మించకుండా పంపాలని సూచించారు. కథ రాసిన పేజీలపై రచయిత పేరు రాయకూడదని, నిబంధనలను అంగీకరిస్తూ విడిగా జతచేసే హామీపత్రంపై మాత్రమే రచయిత పేరు, చిరునామా, ఫోన్ నంబరు, ఈ-మెయిల్ ఐడీ వివరాలను పొందుపరచాలని కోరారు. విజేతల ఎంపికలో న్యాయనిర్ణేతలదే తుది నిర్ణయమని పేర్కొన్నారు. 

మొదటి ఉత్తమ కథకు రూ. 10, 000

పోటీల్లో మొదటి ఉత్తమ కథకు రూ. 10,000/- నగదు పురస్కారం, తర్వాతి తొమ్మిది ఉత్తమ కథలకు ఒక్కొక్కరికి రూ. 1,000/- నగదు పురస్కారంతో పాటు సముచిత సత్కారం ఉంటుందని నిర్వహకులు తెలిపారు. ఈ పురస్కారాలను డిసెంబర్ 4వ తేదీన నిజామాబాద్‌లోని నవ్యభారతి గ్లోబల్ స్కూల్‌లో జరిగే హరిదా రచయితల సంఘం మహాసభలో ప్రదానం చేస్తామన్నారు. ‎అర్హత, ఆసక్తి ఉన్న కథా రచయితలు తమ కథను, హామీ పత్రాన్ని అక్టోబర్ 30వ తేదీ లోపు haridaasaraswathiraj@gmail.com ఈ-మెయిల్ ఐడీకి పంపాలని కోరారు. ఇతర వివరాల కోసం 9030033331 నంబరును సంప్రదించవచ్చని తెలిపారు. కార్యక్రమంలో టీఆర్ఎస్ నేతలు రంగు నవీనాచారి, లకావత్ రూప్ సింగ్, శరత్ తదితరులు పాల్గొన్నారు.

The post Telangana Story Competition 2026: Harida Award Details appeared first on Telangana Jagruthi.

సబ్బండ వర్గాలకు అధికారంలో వాటా దక్కాలి

-తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణసేన, చందుర్తి/వేములవాడ) :

అమరులు కోరుకున్న సమాజాన్ని నిర్మించడమే వారికి మనమిచ్చే సరైన నివాళి అని తెలంగాణ రక్షణసేన చీఫ్ కల్వకుంట్ల కవిత అన్నారు. చందుర్తి మండలం సనుగులలో మంగళవారం నిర్వహించిన అమరుల యాది కార్యక్రమంలో ఆమె మాట్లాడారు. సబ్బండ వర్గాలు, కులాలకు అధికారంలో భాగస్వామ్యం దక్కినప్పుడే అమరుల త్యాగాలకు ఫలితం ఉంటుందన్నారు. సమాజం కోసం ఓ వ్యక్తి తన ప్రాణాలు లెక్క చేయకుండా పోరాటం చేస్తుంటే ఆ కుటుంబ సభ్యుల పరిస్థితి ఎలా ఉంటుందో తనకు తెలుసన్నారు. తెలంగాణ కోసం కేసీఆర్ నిమ్స్ లో 11 రోజుల పాటు నిరాహార దీక్ష చేస్తున్నప్పుడు కుటుంబ సభ్యులుగా ఎంత నరకయాతన అనుభవించామో తనకు మాత్రమే తెలుసన్నారు. కేసీఆర్ తో ఇప్పుడు రాజకీయంగా విభేదించినా,  దారులు వేరైనా సమాజం కోసం ఆయన చేసిన త్యాగాన్ని మాత్రం మర్చిపోవద్దన్నారు. అదే విధంగా తెలంగాణ కోసం అమరులైన వారిని, మంచి సమాజం కోసం అప్పట్లో ఈ ప్రాంతంలో అసువులు బాసిన మావోయిస్టులను గుర్తు చేసుకోవాల్సిన అవసరముందన్నారు. వారు ఆకాంక్షించిన సమాజాన్ని నిర్మించాల్సి ఉందని చెప్పారు. 

అమరుల త్యాగాల ద్వారా సాధించుకున్న తెలంగాణలో ఆ ఫలాలు నిజంగా అందరికీ దక్కాయా అన్నది సమీక్షించుకోవాల్సిన అవసరముందన్నారు. తెలంగాణ వచ్చి 13 ఏళ్లు గడిచినప్పటికీ ఇప్పటికీ పేదవాళ్లు మెరుగైన విద్య, వైద్యం కోసం పోరాడుతునే ఉన్నారని.. ఇదేనా మనం కోరుకున్న తెలంగాణ అని ప్రశ్నించారు. ఆనాడు భూస్వాములు, దొరలపై పోరాడితే.. ఇప్పుడు అధికారం అడ్డం పెట్టుకొని దోచుకుంటున్న వాళ్లపై పోరాటం చేస్తున్నామన్నారు. దోపిడీ విధానం మారిందే తప్ప వారిలో ఆ స్వభావం మారలేదని.. అది మారాలంటే నిరంతరం పోరాటం చేయాలన్నారు. యువత, మహిళలు రాజకీయాల్లోకి వస్తేనే పరిస్థితి మారుతుందన్నారు. మాజీ మావోయిస్టులు, అమర వీరుల కుటుంబాలకు న్యాయం జరిగేలా తాము పోరాటం చేస్తామన్నారు.

The post Kalvakuntla Kavitha Says Telangana Martyrs’ Aspirations Must Shape a Just Society appeared first on Telangana Jagruthi.

రాజన్న ఆలయాన్ని కృష్ణ శిలలతో ఆగమ శాస్త్రం ప్రకారం నిర్మించాలి

రేవంత్ రెడ్డి, మహేష్ గౌడ్ హిట్ జోడీ కాదు.. ఇడుపు కాయితం జోడీ

నవంబర్ వరకు రైతులకు 24 గంటలు ఉచిత కరెంట్ ఇవ్వాల్సిందే

సిరిసిల్ల సెస్ లో జరిగిన అవినీతిపై విచారణ జరపాలి

నేరెళ్ల బాధితుల పేరు చెప్పుకొని అధికారంలోకి వచ్చిన రేవంత్ రెడ్డి వాళ్లను మళ్లీ మోసం చేశారు

-తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణసేన, వేములవాడ) :

వేములవాడ రాజన్న గుడిని కాంక్రీట్ తో నిర్మిస్తూ భక్తుల విశ్వాసాన్ని దెబ్బతీస్తున్నారని తెలంగాణ రక్షణసేన చీఫ్ కల్వకుంట్ల కవిత ఆందోళన వ్యక్తం చేశారు. ఆగమ శాస్త్రం ప్రకారం కృష్ణశిలలతో వెయ్యేళ్లు నిలిచేలా ఆలయాన్ని నిర్మించాలని డిమాండ్ చేశారు. మంగళవారం రాజన్న సిరిసిల్ల జిల్లాలో ఆమె పర్యటించారు. వేములవాడ శ్రీ భీమేశ్వర స్వామిని దర్శించుకుని ప్రత్యేక పూజలు చేసిన అనంతరం మీడియాతో మాట్లాడారు. ఆలస్యమైనా సరే భక్తుల మనోభావాలకు అనుగుణంగా ఆగమశాస్త్రం ప్రకారం వేములవాడ రాజన్న గుడిని నిర్మించాలని కోరారు. రాజన్న కోడెలు చనిపోతున్నప్పటికీ పట్టించుకోవడం లేదని వాటికి సరైన పశుగ్రాసం అందించడం లేదన్నారు.  కోడె మొక్కులకు ప్రసిద్ధి చెందిన వేములవాడ ఆలయంలో కోడెలకు ఇలాంటి దయనీయ పరిస్థితి మంచిది కాదని చెప్పారు. కోడెలు చనిపోతే శాస్త్ర ప్రకారం అంత్యక్రియలు కూడా జరిపించడం లేదని ఆగ్రహం వ్యక్తం చేశారు. మాట్లాడితే హిందూత్వ అనే బండి సంజయ్ ఈ విషయంలో ఎందుకు మౌనంగా ఉంటున్నారని ప్రశ్నించారు. కేంద్ర మంత్రిగా ఉండి కూడా ప్రసాద్ స్కీమ్ లో దక్షిణ కాశీగా ప్రాశస్త్యం పొందిన వేములవాడ ఆలయాన్ని చేర్చలేదని.. రాజన్న ఆలయానికి ఆయన ఒక్క రూపాయి కూడా తేలేదని దీనిపై సంజయ్ సమాధానం చెప్పాలని డిమాండ్ చేశారు. ఎన్నో రాష్ట్రాల నుంచి భక్తులు వచ్చే వేములవాడలో మౌలిక సదుపాయాలు ఏమాత్రం బాగాలేవన్నారు. రోడ్లు, డ్రైనేజీ వ్యవస్థ బాగు చేసేందుకు స్థానిక ఎమ్మెల్యే  కృషి చేయాలన్నారు. తమ అమ్మనాన్న పెళ్లి ఇక్కడే జరిగిందని ఈ ప్రాంతంతో తనకు ఎంతో అనుబంధం ఉందని కవిత గుర్తు చేసుకున్నారు. 

కాళేశ్వరం ప్రాజెక్టుతో సిరిసిల్ల, వేములవాడకు ఎంతో ప్రయోజనం దక్కాలని.. కానీ ఒక్క ఎకరాకు కూడా నీళ్లు రాలేదని చెప్పారు. రుద్రంగిలో 2018లో శంకుస్థాపన చేసిన రిజర్వాయర్ ను పదేళ్లైనా పూర్తి చేయలేదన్నారు. అది పూర్తైతే 63 వేల ఎకరాలకు నీళ్లొస్తాయన్నారు. దూమ్ పేట్ వద్ద రిజర్వాయర్ కట్టి ఎత్తిపోస్తే కథలాపూర్, మేడిపల్లికి నీళ్లు వస్తాయన్నారు. ఎర్రకుంట, పటేళ్ల చెరువును కలిపి అక్కడ రిజర్వాయర్ కడితే వేములవాడ, చందుర్తి, కోనరావు పేట మండలాలకు  నీళ్లు వచ్చే అవకాశం ఉందన్నారు. తెలంగాణ వచ్చి 13 ఏళ్లైనా ఇలాంటి పరిస్థితి ఉండటం అన్యాయమన్నారు. మిడ్ మానేర్, అప్పర్ మానేర్ లింక్ పనులను పూర్తి చేయాలని.. అది పూర్తి చేస్తే లక్షా 10 వేల ఎకరాలకు నీళ్లు ఇవ్వవచ్చని చెప్పారు. 

సెస్ లో అవినీతిపై విచారణ జరపాలి

సిరిసిల్లలోని సెస్ లో జరిగిన రూ.32 కోట్ల అవినీతిపై ప్రభుత్వం విచారణ జరిపించాలని కవిత డిమాండ్ చేశారు. కేటీఆర్ మంత్రిగా ఉన్న సమయంలో ఈ అవినీతి జరిగిందని.. దీనిపై కాంగ్రెస్ ప్రభుత్వం ఎందుకు విచారణ జరపటం లేదని ప్రశ్నించారు. సెస్ లో జరిగిన అవినీతి బయట పడకుండా ఉండేందుకు సరిగ్గా కాంగ్రెస్ అధికారంలోకి వచ్చిన వెంటనే ఇక్కడ అగ్నిప్రమాదం జరిగిందని గుర్తు చేశారు. ఆ ప్రమాదంలో ఫైల్స్ అన్ని కాలిపోయాయని చెప్పి చేసిన అవినీతి నుంచి తప్పించుకునే ప్రయత్నం చేశారన్నారు. సహకార విద్యుత్ రంగంలో ప్రతిష్ఠాత్మకమైన సెస్ ను ఎన్పీడీఎల్ లో కలిపి వినియోగదారులను ఇబ్బంది పెడుతున్నారన్నారు. నేతన్నలు, చేనేతలు ఎక్కువగా ఉన్న సిరిసిల్లలో యార్న్ డిపో ఏర్పాటు చేయకుండా అధికార దర్పం ప్రదర్శించేందుకు వేములవాడలో ఏర్పాటు చేశారని విమర్శించారు. రాజకీయాల కోసం ప్రజలను ఇబ్బంది పెట్టటం మంచిది కాదని సూచించారు. 

సిరిసిల్ల జిల్లా అయిన తర్వాత నీటి పారుదల రంగంలో ఎంతో మార్పు వస్తుందని భావించినప్పటికీ ఉమ్మడి రాష్ట్రంలో ఉన్న పరిస్థితే ఉందన్నారు. యువ సామ్రాట్ అని చెప్పుకునే కేటీఆర్ ఎమ్మెల్యేగా ఉన్న సిరిసిల్లలో జేఎన్టీయూను తీసుకొస్తే ల్యాబ్ కోసం జగిత్యాలకు వెళ్లే పరిస్థితి తెచ్చారని ఎద్దెవా చేశారు. మెడికల్ కాలేజీ ఏర్పాటు చేసినా మెడికోలకు కనీసం హాస్టల్ లో సరైన సౌకర్యాలు లేకుండా చేశారన్నారు. ఒక్కో రూమ్ లో 16 మంది ఉంటున్నారని తెలిపారు. గల్ఫ్ బాధితులను ఆదుకునే విషయంలో గత ప్రభుత్వం విఫలమైందని.. కాంగ్రెస్ ప్రభుత్వం ఏర్పాటు చేసిన అడ్వయిజరీ కమిటీ కూడా ఆగమైందన్నారు. ఇప్పటికైనా గల్ఫ్ బాధితులను ఆదుకునేందుకు చర్యలు తీసుకోవాలన్నారు. ఇప్పటి వరకు గల్ఫ్ లో చనిపోయిన 112 మంది కార్మికులకు రూ. 5 లక్షల చొప్పున ఎక్స్ గ్రేషియా అందజేయాలన్నారు. సిరిసిల్ల ప్రజల దశాబ్దాల రైలు కల సాకారం చేసేందుకు తమ పార్టీ తరఫున పోరాటం చేస్తామన్నారు. సిరిసిల్లలో ముంజూరైన 15 పడకల ఈఎస్ఐ హాస్పిటల్ ను పూర్తి చేసేందుకు కేంద్ర మంత్రి బండి సంజయ్ కృషి చేయాలని కోరారు. 

అబద్ధాలొద్దిన్

రేవంత్ రెడ్డి, మహేష్ గౌడ్ లు మాట్లాడితే హిట్ జోడి అంటున్నారని.. కానీ వాళ్లది ఇడుపు కాగితం జోడీ అని  ఎద్దెవా చేశారు. మహేశ్ కుమార్ గౌడ్ ఒకటి మాట్లాడితే.. రేవంత్ రెడ్డి ఒకటి మాట్లాడుతున్నారని.. హిట్ జోడీ అయితే వేర్వేరుగా ఎలా మాట్లాడతారని ప్రశ్నించారు. కాంగ్రెస్ పాలనలో రైతులు ఆగమావుతున్నారని ఆందోళన వ్యక్తం చేశారు. ఇప్పటికే రాష్ట్ర వ్యాప్తంగా వేసిన కోటి 10 లక్షల ఎకరాల పంటలను కాపాడాలంటే నవంబర్ వరకు రైతులకు ఉచిత కరెంట్ ఇవ్వాల్సిందేనని డిమాండ్ చేశారు. అడుక్కోనైనా, కొనుక్కోనైనా ఉచిత కరెంట్ ఇవ్వాలన్నారు. లేదంటే పార్టీలకు అతీతంగా ప్రభుత్వంపై పోరాటం చేస్తామని హెచ్చరించారు. రేవంత్ సర్కార్ అన్ని అంశాల్లోనూ ఫెయిల్ అయ్యిందని ప్రతి దానికీ కమిటీ అంటూ కాలయాపన చేస్తుందన్నారు. జర్నలిస్టులకు ఇండ్ల స్థలాలు ఇచ్చే విషయంలో వారిని మోసం చేశారని చెప్పారు. ఉర్దూ పేపర్ కు సంబంధించి మండలానికి ఒక్కరికే అక్రిడేషన్ ఇస్తామంటున్నారని..  ముస్లింలు అన్నా ఉర్దూ అన్నా రేవంత్ రెడ్డికి ఎందుకంత చిన్నచూపని ప్రశ్నించారు. ముస్లింలకు ఏదో మంచి చేస్తున్నట్లు తన పేరు రేవంతొద్దీన్ అని చెప్పుకుంటున్నారని కానీ ఆయన పేరు అబద్దాలొద్దీన్ అని పెట్టుకోవాలన్నారు. 

నేరెళ్ల బాధితులకు న్యాయం చేసే వరకు పోరాడుతాం

నేరెళ్ల బాధితుల పేరు చెప్పుకొని అధికారంలోకి వచ్చిన రేవంత్ రెడ్డి వాళ్లను మళ్లీ మోసం చేశారని  మండిపడ్డారు. సిరిసిల్ల సభలో వారికి న్యాయం చేస్తారని భావిస్తే రూ. 5 లక్షలు, రూ.10 లక్షల చెక్కులిచ్చి చేతులు దులుపుకున్నారని మండిపడ్డారు. వారిని గ్రూపులుగా విడగొట్టి పరిహారంలో వ్యత్యాసం చూపడం అన్యాయమన్నారు. రేవంత్ రెడ్డి సభ తర్వాత నేరెళ్ల బాధితులు తనను కలిసి ముఖ్యమంత్రి చేసిన మోసాన్ని వివరించారని చెప్పారు. వారి కేసులకు సంబంధించిన ఆధారాలను పూర్తిగా మాయం చేశారని.. ఆనాటి జైలర్, అప్పటి డీఐజీ  బాధితులతో చేసిన విచారణ నివేదికలు ఎక్కడ పోయాయో చెప్పాలని డిమాండ్ చేశారు. ఈ అంశంపై సిరిసిల్ల ఎస్పీ శ్వేతపత్రం విడుదల చేయాలని డిమాండ్ చేశారు. బాధిత కుటుంబాలకు కోటి రూపాయల పరిహారంతో పాటు మూడు ఎకరాల భూమి, వారి కుటుంబంలో ఒకరికి ప్రభుత్వ ఉద్యోగం ఇవ్వాలన్నారు. సామాజిక న్యాయానికి ప్రాధాన్యత ఇచ్చే పార్టీగా నేరెళ్ల బాధితులకు న్యాయం జరిగే వరకు తాము పోరాడుతూనే ఉంటామని స్పష్టం చేశారు. రానున్న రోజుల్లో ప్రధాన పార్టీలతో సమానంగా తమ పార్టీ ఉద్యమిస్తుందని.. ప్రజల పక్షాన పని చేస్తుందని తెలిపారు.

The post Vemulawada Rajanna Temple: Kavitha Demands Krishna Shila Construction as per Agama Shastra appeared first on Telangana Jagruthi.

భీమేశ్వరాలయంలో ప్రత్యేక పూజలు.. వేములవాడ ఆలయ అభివృద్ధి పరిశీలన

చందుర్తి మండలం సనుగులలో అమరుల యాదిలో కార్యక్రమంలో పాల్గొననున్న టీఆర్ఎస్ చీఫ్

(తెలంగాణ రక్షణసేన, హైదరాబాద్) :

తెలంగాణ రక్షణసేన చీఫ్ కల్వకుంట్ల కవిత మంగళవారం రాజన్న సిరిసిల్ల జిల్లాలో పర్యటించనున్నారు. ఉదయం 8 గంటలకు వేములవాడకు చేరుకొని భీమేశ్వరాలయంలో ప్రత్యేక పూజలు చేస్తారు. అనంతరం వేములవాడ ఆలయ అభివృద్ధి పనులను పరిశీలిస్తారు. ఉదయం 10 గంటలకు వేములవాడ మార్కెట్ రోడ్డులోని మున్నూరుకాపు సంఘ భవనంలో మీడియాతో మాట్లాడుతారు. ఉదయం 11 గంటలకు చందుర్తి మండలం సనుగుల గ్రామంలో నిర్వహించే అమరుల యాది కార్యక్రమంలో పాల్గొని ప్రసంగిస్తారు.

The post K. Kavitha to Visit Rajanna Sircilla: Vemulawada Temple Visit, Sanugula Event appeared first on Telangana Jagruthi.

మెడికల్ బోర్డుకు అప్లయ్ చేసుకున్న వారి వారసులందరికీ ఉద్యోగాలివ్వాలి

సింగరేణి లాభాల్లో కార్మికులకు 35 శాతం వాటా చెల్లించాలి

-తెలంగాణ రక్షణ సేన చీఫ్ కల్వకుంట్ల కవిత

హెచ్ఎంఎస్, టీఆర్ఎస్ నాయకులతో కలిసి సింగరేణి భవన్ ముట్టడి, ధర్నా

(తెలంగాణ రక్షణసేన, హైదరాబాద్) :

 సింగరేణి కార్మికులు ఎదుర్కొంటున్న సమస్యలు రెండు నెలల్లోగా పరిష్కరించకుంటే హైదరాబాద్ లోని సింగరేణి భవన్ ఎదుట నిరవధిక నిరాహార దీక్ష చేస్తానని తెలంగాణ రక్షణ సేన చీఫ్ కల్వకుంట్ల కవిత హెచ్చరించారు. మెడికల్ బోర్డుకు దరఖాస్తు చేసుకున్న కార్మికులను అన్ ఫిట్ చేయడంతో పాటు కార్మికుల సమస్యలు పరిష్కరించాలని డిమాండ్ చేస్తూ హెచ్ఎంఎస్, తెలంగాణ రక్షణ సేన నాయకులతో కలిసి సోమవారం లక్డీకాపూల్ లోని సింగరేణి భవన్ ను ముట్టడించారు. గంటకు పైగా నడి ఎండలో రోడ్డుపై బైఠాయించి కార్మికుల కోసం ఆందోళన చేపట్టారు. సింగరేణి యాజమాన్యం దిగివచ్చి తమతో చర్చలు జరిపే వరకు అక్కడి నుంచి కదిలేది లేదని భీష్మించుకొని కూర్చున్నారు. హెచ్ఎంఎస్, టీఆర్ఎస్ ఆందోళనతో సింగరేణి భవన్ ఎదుట పెద్ద ఎత్తున ట్రాఫిక్ స్తంభించింది. దీంతో సింగరేణి యాజమాన్యం తరపున అధికారులు బయటికి వచ్చి ఆందోళన చేస్తున్న కల్వకుంట్ల కవిత, హెచ్ఎంఎస్ నాయకులతో చర్చలు జరిపారు. సింగరేణి సీ అండ్ ఎండీ సెక్రటేరియట్ లో సమావేశంలో ఉన్నారని.. ఆయన ఆదేశాల మేరకు తాము చర్చలకు వచ్చామని తెలిపారు. సింగరేణి కార్మికుల న్యాయమైన డిమాండ్ల పరిష్కారానికి కృషి చేస్తామని హామీ ఇచ్చారు. కవిత స్పందిస్తూ సింగరేణి యాజమాన్యానికి రెండు నెలల సమయం ఇస్తున్నామని, అప్పటి వరకు పరిష్కారం కాకపోతే ఆమరణ నిరాహార దీక్షకు దిగుతానని స్పష్టం చేశారు.

ఈ సందర్భంగా కవిత మాట్లాడుతూ.. సింగరేణిలో మెడికల్ బోర్డుకు అప్లయ్ చేసుకున్న వాళ్లందరినీ అన్ ఫిట్ చేసి వాళ్ల వారసులకు ఉద్యోగాలు ఇవ్వాలని డిమాండ్ చేశారు. రెండు నెలల్లోగా ఈ ప్రక్రియ ప్రారంభం కావాలని.. లేదంటే హైదరాబాద్ లోని సింగరేణి భవన్ గేటు ఎదుట నిరవధిక నిరాహార దీక్ష చేపడతానని హెచ్చరించారు. దేశానికే వెలుగులిస్తున్న సింగరేణి కార్మికుల సంక్షేమాన్ని యాజమాన్యం పట్టించుకోవటం లేదని విమర్శించారు. మూడు నెలల క్రితం తాము ఒత్తిడి తెస్తేనే మెడికల్ బోర్డు పెట్టారని.. కానీ మెడికల్ బోర్డుకు అప్లయ్ చేసుకున్న వారిలో 10 శాతం మందిని మాత్రమే అన్ ఫిట్ చేస్తున్నారని మండిపడ్డారు. తెలంగాణ సాధించుకున్న తర్వాత అన్ ఫిట్ కోసం అప్లయ్ చేసుకున్న వాళ్లందరినీ అన్ ఫిట్ చేసి వాళ్ల వారసులకు ఉద్యోగాలు ఇచ్చామని గుర్తు చేశారు. కానీ కాంగ్రెస్ ప్రభుత్వం మాత్రం డిపెండెంట్ ఉద్యోగాలను ఇవ్వకుండా కార్మికులను ఇబ్బంది పెట్టే పనిచేస్తుందన్నారు. డిపెండెంట్ ఉద్యోగాలు మీరు వేసే భక్షం కాదు, అది కార్మికుల హక్కు అని చెప్పారు. సింగరేణి లాభాల్లో 35 శాతం కార్మికులకు బోనస్ ఇవ్వాలని డిమాండ్ చేశారు. అలియాస్ పేర్లతో ఉద్యోగాలు చేస్తున్న వారి వారసులకు ఉద్యోగాలు ఇవ్వకుండా విజిలెన్స్ విచారణతో ఇబ్బంది పెడుతున్నారని తెలిపారు. ఇలా వేధింపులకు గురి చేసి అక్రమంగా ఉద్యోగాల నుంచి తొలగించిన వాళ్లను వెంటనే విధుల్లోకి తీసుకోవాలన్నారు. సింగరేణి బాగుంటేనే తెలంగాణ బాగుంటుందని.. తెలంగాణకు సింగరేణి ఆత్మవంటిదన్నారు. అలాంటి సింగరేణి కార్మికుల సంక్షేమం కోసం టీఆర్ఎస్, హెచ్ఎంఎస్ పోరాటం చేస్తుందన్నారు. సింగరేణి సంస్థకు రాష్ట్ర ప్రభుత్వం రూ.60 వేల కోట్లు బకాయిలు పెట్టటంతోనే సంస్థ ఇబ్బందుల్లో ఉందన్నారు. వెంటనే ఆ బకాయిలను చెల్లించి సంస్థను కాపాడాలని డిమాండ్ చేశారు. 

సింగరేణి ద్రోహుల చేతిలో ఉంది-రియాజ్ అహ్మద్

సింగరేణి సంస్థ ద్రోహుల చేతిలో బందీ అయ్యిందని హెచ్ఎంఎస్ ప్రధాన కార్యదర్శి రియాజ్ అహ్మద్ ఆవేదన వ్యక్తం చేశారు. స్వతంత్ర సంస్థగా ఉండాల్సిన సింగరేణిని మంత్రుల చేతిలో కీలుబొమ్మగా మార్చేశారన్నారు. ఇకనైనా యాజమాన్యం వైఖరిలో మార్పు రావాలని డిమాండ్ చేశారు. డిపెండెంట్ ఉద్యోగాలు సహా కార్మికుల సంక్షేమం కోసం పనిచేయాలని సూచించారు. కొత్త బొగ్గు బావులను ప్రైవేట్ సంస్థలకు కాకుండా సింగరేణి ద్వారా నిర్వహించాలని.. నైనీ బ్లాక్ లో కూడా సింగరేణి నుంచి కార్మికులను నియమించాలన్నారు.

The post Singareni Workers’ Demands: Kavitha Gives 60-Day Deadline, Warns of Hunger Strike appeared first on Telangana Jagruthi.

వాళ్లను బాధితులు అనడానికి ఆధారాలే లేవట.. ఇందుకు ప్రభుత్వం సిగ్గు పడాలి

ఆనాటి ప్రభుత్వంలోని కొందరు సాగించిన దాష్టీకాల ఆధారాలు మాయం చేశారు

నేరెళ్ల బాధితులను మోసం చేసిన రేవంత్ రెడ్డికి గుణపాఠం తప్పదు

-తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణసేన, హైదరాబాద్) :

నేరెళ్ల బాధితులను కాంగ్రెస్, బీఆర్ఎస్ దగా చేస్తున్నాయని తెలంగాణ రక్షణసేన చీఫ్ కల్వకుంట్ల కవిత మండిపడ్డారు. ఆనాటి బీఆర్ఎస్ ప్రభుత్వంలో ఇసుక మాఫియాను అడ్డుకొని ప్రశ్నించినందుకు నేరెళ్ల బాధితులపై జరిపిన దాష్టీకాల ఆధారాలను మాయం చేశారని ధ్వజమెత్తారు. ఆ ఆధారాలు బీఆర్ఎస్ ప్రభుత్వంలోనే మాయం చేశారా.. లేక కాంగ్రెస్ వచ్చాక మాయం అయ్యాయా చెప్పాలని నిలదీశారు. ఈమేరకు ఆదివారం మీడియాకు వీడియో సందేశం రిలీజ్ చేశారు. నేరెళ్ల బాధితుల దుఃఖాన్ని వాడుకొని అధికారంలోకి వచ్చిన రేవంత్ రెడ్డి.. ఇప్పుడు వారిని మోసం చేస్తున్నాడని అన్నారు. అధికారంలోకి వచ్చి మూడేళ్లైనా ఆనాటి రిపోర్టులను ఇప్పటి వరకు వెలుగులోకి రాలేదని.. ఇప్పుడు అసలు వారు బాధితులని చెప్పటానికి ఆధారాలే లేవంటున్నారని ఆగ్రహం వ్యక్తం చేశారు. ఇందుకు రేవంత్ రెడ్డి ప్రభుత్వం సిగ్గుతో తలదించుకోవాలని అన్నారు. నేరెళ్ల బాధితుల విషయంలో ఆయన వ్యవహరిస్తున్న తీరుకు తగిన శాస్తి తప్పదని హెచ్చరించారు. సీఎం సిరిసిల్ల పర్యటనలో నేరెళ్ల బాధితులకు న్యాయం చేస్తారని భావిస్తే.. బాధితులకు రూ.5 లక్షలు, రూ.10 లక్షల చెక్కులు ఇచ్చి చేతులు దులుపుకున్నారని మండిపడ్డారు. బాధిత కుటుంబాలకు కోటి రూపాయల పరిహారం, మూడు ఎకరాల భూమి, ప్రభుత్వ ఉద్యోగం ఇచ్చినప్పుడే వారికి న్యాయం జరగుతుందని..ముఖ్యమంత్రి ఊకదంపుడు ఉపన్యాసాలిస్తే జరగదని అన్నారు.

ఆధారాలు ఏమైనట్లు?

నేరెళ్ల ఘటనకు సంబంధించిన కీలకమైన ఆధారాలున్న రిపోర్టులు మాయమైనట్లు బాధితులు ఆందోళన వ్యక్తం చేస్తున్నారని కవిత చెప్పారు. అసలు ఆ రిపోర్టులు ఏమయ్యాయో ప్రభుత్వం సమాధానం చెప్పాలని డిమాండ్ చేశారు. అప్పటి జైలర్ రాసిన నివేదికలు, డీఐజీ రవివర్మ బాధితులతో మాట్లాడిన అంశాలతో సిద్ధం చేసిన రిపోర్టులు ఎటు పోయాయని ప్రశ్నించారు. కాంగ్రెస్ పార్టీ ఎన్నికల్లో ఇచ్చిన ప్రధాన హామీల్లో నేరెళ్ల బాధితులకు న్యాయం చేస్తామన్న హామీ ఒకటని గుర్తు చేశారు. అధికారంలోకి వచ్చి మూడేళ్లైనా ఆ ఫైళ్లను కూడా చూడలేదని.. ముఖ్యమంత్రి సిరిసిల్లకు సభకు ముందు హడావుడిగా కేసు ఫైళ్లను చూసి న్యాయం చేయలేమని చెప్పడం సిగ్గుచేటన్నారు. ఘటనకు సంబంధించిన ఆధారాలు ఎవరి హయాంలో మాయమయ్యాయో చెప్పాలని డిమాండ్ చేశారు. బీఆర్ఎస్ ప్రభుత్వం ఉన్నప్పుడే ఆధారాలు మాయం చేశారా లేక కాంగ్రెస్ అధికారంలోకి వచ్చాక మాయమయ్యా చెప్పాలన్నారు. బీఆర్ఎస్ హయాంలోనే ఆధారాలు ధ్వంసమై ఉంటే బాధ్యులైన అధికారులు, నాయకులపై ఎందుకు చర్యలు తీసుకోలేదని ప్రభుత్వాన్ని నిలదీశారు. ఫోన్ ట్యాపింగ్ కేసులోనూ ఇలాగే ఆధారాలు మాయం చేశారని చెప్తున్నారని గుర్తు చేశారు. కాంగ్రెస్, బీఆర్ఎస్ లు కలిసి నేరెళ్ల బాధితులను దగా చేస్తున్నాయని ఆగ్రహం వ్యక్తం చేశారు. ఆనాటి ఆధారాలను మాయం చేసి బాధితులకు అన్యాయం చేసేలా కాంగ్రెస్, బీఆర్ఎస్ కుట్రలు చేస్తున్నాయన్నారు. 

ఎస్సీ కమిషన్ నివేదిక ఏమైంది?

నేరెళ్ల ఘటనకు సంబంధించి నేషనల్ ఎస్సీ కమిషన్ ప్రజాకోర్టు, పబ్లిక్ హియరింగ్ నిర్వహించినా ఇప్పటికీ నివేదిక ఇవ్వలేదన్నారు. దీనిపై రాష్ట్ర ప్రభుత్వం ఒత్తిడి పెంచి ఆ రిపోర్ట్ ఇవ్వాలని ఎందుకు అడగడం లేదని ప్రశ్నించారు. తాము ఎన్నిసార్లు ఎస్సీ కమిషన్ అపాయింట్ మెంట్ అడిగినా ఇవ్వడం లేదని.. దీని వెనుక ఏ శక్తి ఉందో అర్థం కావడం లేదన్నారు. బాధితులకు న్యాయం కోసం రాష్ట్ర ప్రభుత్వానికి లేఖ రాస్తామన్నారు. 2017 జులైలో నేరెళ్లలో జరిగిన దాష్టీకం సిగ్గుతో తలదించుకునే ఘటన అని.. ఆ ఘటనను తెలంగాణ సమాజం ఎన్నటికీ మరిచిపోదని చెప్పారు. ఇసుక అక్రమ రవాణాను అడ్డుకున్నందుకు దళితులను టార్గెట్ చేసి కేసులు హింసిస్తే వారికి ఇప్పటికీ న్యాయం జరగకపోవడం దుర్మార్గమన్నారు. 

బాధితులపై పెట్టిన కేసులు ఉపసంహరించుకోవాలి

నేరెళ్ల సంఘటనలో బాధితులపైనే అక్రమ కేసులు పెట్టి వారిని ఇబ్బందులు పెడుతున్నారని కవిత మండిపడ్డారు. నిందితులను కాపాడే విధంగా ఆధారాలు మాయం చేసి.. బాధితులను మాత్రం ఇబ్బంది పెట్టడం అన్యాయమన్నారు. వారిపై పెట్టిన కేసులను ప్రభుత్వం వెంటనే ఉపసంహరించుకోవాలని డిమాండ్ చేశారు. ఇంకా కోర్టుల చుట్టూ తిరిగే ఓపిక వారికి లేదన్నారు. ప్రభుత్వం ఇకనైనా నిందితులను కాపాడే చర్యలు మానుకొని బాధితులకు అండగా నిలవాలని డిమాండ్ చేశారు.

The post Nerella Victims: K.Kavitha Demands Justice, Questions Missing Records and Compensation appeared first on Telangana Jagruthi.

వరుణయాగం చేసి ప్రజల ఖర్మ అన్నట్లుగా వదిలేశారు

కరవు, రైతు సమస్యలపై ప్రత్యేక కేబినెట్ ఏర్పాటు చేయాలి

రైతులకు 24 గంటల ఉచిత కరెంట్ ఇవ్వాల్సిందే

దక్షిణాది రాష్ట్రాలను కరవు నుంచి ఆదుకోకపోతే ప్రధాని మోడీని ప్రజలు క్షమించరు

పేపర్ బ్యాలెట్ విధానంలో ఎన్నికలే క్షేమం

-తెలంగాణ రక్షణసేన చీఫ్ కల్వకుంట్ల కవిత

(తెలంగాణ రక్షణసేన, హైదరాబాద్)

 రాష్ట్రంలో కరవు ఏర్పడ్డానికి ప్రభుత్వ వైఫల్యమే కారణమని తెలంగాణ రక్షణసేన చీఫ్ కల్వకుంట్ల కవిత ఆరోపించారు. రాష్ట్రంలో ఏర్పడ్డ కరవు పరిస్థితిని ఎదుర్కొనేందుకు రైతుల సమస్యలు తీర్చేందుకు ప్రత్యేక కేబినెట్ సమావేశం పెట్టాలని  డిమాండ్ చేశారు. ఎండలు కూడా విపరీతంగా పెరిగే పరిస్థితి ఉందని చెబుతున్నారని.. ఆ పరిస్థితిని తట్టుకునేందుకు ప్రభుత్వం కార్యాచరణ సిద్ధం చేయాలని సూచించారు. బంజారాహిల్స్ లోని తెలంగాణ రక్షణసేన ప్రధాన కార్యాలయంలో ఆదివారం ఆమె మీడియా సమావేశంలో మాట్లాడారు. రాష్ట్ర వ్యాప్తంగా ఉన్న కరవు పరిస్థితులు చూస్తుంటే కడుపు తరుక్కుపోతున్నదని కవిత ఆవేదన వ్యక్తం చేశారు. అన్ని జిల్లాల్లో కరవు తాండవిస్తున్నదని, భూగర్భ జలాలు కొన్ని చోట్ల 20 మీటర్ల లోతుకు పడిపోయాయని వెల్లడించారు. చాలా చోట్ల రైతన్నలు తమ పంటలు కాల్చుకుంటున్న దైన్యస్థితిని చూస్తున్నామన్నారు. జులైలో 1 శాతం తక్కువ వర్షపాతం నమోదైతే ఆగస్ట్ లో 38, సెప్టెంబర్ 30 శాతం తక్కువ వర్షపాతం నమోదైందని వివరించారు. ఈ ఏడాది సూపర్ ఎల్ నినో ఉంటుందని ఆరు నెలల ముందే  సైంటిస్టులు ప్రపంచాన్ని హెచ్చరించారని కవిత గుర్తు చేశారు. కానీ తెలంగాణ ప్రభుత్వం ఏనాడూ కనీసం రివ్యూ చేసి పరిస్థితిని తెలుసుకున్న పాపాన పోలేదని విమర్శించారు.

నీటి పారుదల, అగ్రికల్చర్, పవర్ మినిస్ట్రీలతో ముఖ్యమంత్రి సమీక్ష చేయాల్సింది పోయి పట్టించుకోలేదని దుయ్యబట్టారు. నాగార్జున సాగర్ కు పోయి వరుణయాగం చేసి దేవుడు వానలు కురిపిస్తే కురిపించినట్లు లేకుంటే మీ ఖర్మ అన్నట్లు వదిలేశాడని మండిపడ్డారు.  

రాష్ట్రంలో ఇప్పటికీ కోటి 20 లక్షల ఎకరాల పంట ఉందని, నవంబర్ వరకు ఆ పంటలకు సంపూర్ణంగా కరెంట్ ఇస్తేనే ఆ పంటలు బతుకుతాయని తెలిపారు. కరెంట్ ఉంటేనే బోర్ల ద్వారా రైతులు పంటలను కాపాడుకునే పరిస్థితి ఉందని కవిత తెలిపారు. కానీ రాష్ట్రంలో ఏ ఊళ్లో కూడా 6 నుంచి 7 గంటలు కూడా విద్యుత్ సరఫరా కావటం లేదని ఆరోపించారు.

ముఖ్యమంత్రి సొంతూరు కొండారెడ్డిపల్లిలో కూడా 7 గంటలు కరెంట్ వస్తలేదని చెప్పారు.

మీరు అడుక్కుంటారో, కొనుక్కుంటారో మాకు తెలియదు.. వ్యవసాయానికి 24 గంటలు ఉచిత కరెంట్ ఇవ్వాల్సిందేనని డీమాండ్ చేశారు. 

కేంద్రం ఆదుకోవాలి

మొన్న జరిగిన కేబినెట్ మీటింగ్ తర్వాత కరవు మండలాలను ప్రకటిస్తారని భావించామని కవిత అన్నారు. మహారాష్ట్ర, కర్ణాటక, ఏపీలు కరవు మండలాలను ఇప్పటికే ప్రకటించాయని గుర్తు చేశారు. కరవు మండలాలను ప్రకటిస్తే కేంద్రం నుంచి రాష్ట్రానికి సాయం అందే అవకాశం ఉంటుందని చెప్పారు. కానీ ఇప్పుడు ప్రభుత్వం కరవు ఉందని చెబితే కేంద్రం నుంచి వచ్చే బృందాలు విజిట్ చేసి సాయం చేయటం కష్టమైన పనని చెప్పారు. కనీసం కరవు మండలాలను కూడా గుర్తించలేని అచేతన స్థితిలో ఈ ప్రభుత్వం ఉందని దుయ్యబట్టారు. రైతులను, పంటలను ఆదుకునేందుకు కచ్చితంగా కేబినెట్ సమావేశం ఏర్పాటు చేయాలని సూచించారు. కరవుతో అల్లాడుతున్న మహారాష్ట్ర సహా దక్షిణాది రాష్ట్రాలను ఆదుకోవాలని ప్రధాని మోడీకి విజ్ఞప్తి చేశారు. ఈ సమయంలో కేంద్రం సాయం చేయకపోతే కచ్చితంగా ప్రజలు క్షమించరని స్పష్టం చేశారు. తెలంగాణ ఏర్పడిన తర్వాత కేంద్రం రూపాయి కూడా ఎక్కువ సాయం చేయలేదని.. ఇప్పుడైనా తెలంగాణను ఆదుకోవాలని కోరారు. చాలా రాష్ట్రాల్లో అధికంగా కరెంట్ ఉత్పత్తి జరుగుతున్నదని, ఆ కరెంట్ ను దక్షిణాది రాష్ట్రాలకు ఉచితంగా ఇవ్వాలని డిమాండ్ చేశారు.

తెలంగాణ ముఖ్యమంత్రి రేవంత్ రెడ్డి వరుణయాగం అంటూ రాష్ట్రాన్ని అచేతన స్థితిలో పెట్టారని.. మీరైనా ఆదుకోవాలంటూ ప్రధానిని కోరారు. కరెంట్ సప్లయ్ లేకపోవటం కారణంగా కూరగాయలు సహా అన్ని నిత్యవసరాల ధరలు పెరుగుతున్నాయని చెప్పారు. 

సింగరేణికి రాష్ట్ర ప్రభుత్వం కట్టాల్సిన అప్పు కట్టకపోవటంతో కరెంట్ సప్లయ్ ఇబ్బంది అవుతుందని తాము గతంలోనే చెప్పామని గుర్తు చేశారు. ఇప్పుడు సింగరేణి కరెంట్ ను వేరే రాష్ట్రాలకు అమ్ముతున్నదని, అప్పుడే బకాయిలు చెల్లించి ఉంటే ఇవ్వాళ ఈ పరిస్థితి ఉండేది కాదన్నారు. గతంలో తాము చెప్పిన అన్ని అంశాలను బేరీజు వేసి చూస్తే ఈ ప్రభుత్వం ఎంత అసమర్థ ప్రభుత్వమో అర్థమవుతుందని విమర్శించారు. ఇప్పటికైనా ప్రభుత్వం స్పందించకపోతే 60 శాతం మంది రైతులు ఆగమయ్యే పరిస్థితి ఉందని ఆందోళన వ్యక్తం చేశారు.

తాగునీటికీ కటకట

వర్షాభావంతో ఈ సమస్య ఇక్కడితోనే అయిపోదని, రానున్న రోజుల్లో తాగునీటి సమస్య కూడా వచ్చే ప్రమాదం ఉందని కవిత చెప్పారు. ఇప్పటికే అన్ని రిజర్వాయర్లలో నీళ్లు డెడ్ స్టోరేజీకి చేరాయని తెలిపారు. కనీసం కృష్ణాజలాలను కాపాడుకునేందుకు కూడా ఈ ప్రభుత్వం ఏం చర్యలు తీసుకోలేదని చెప్పారు. మన నీళ్లను మహబూబ్ నగర్ నుంచి కుప్పం తరలిస్తున్నా ముఖ్యమంత్రి పట్టించుకోలేదని విమర్శించారు. నార్లపూర్ రిజర్వాయర్ కు కొంత ఖర్చు చేసి ఉంటే ఇప్పుడు గ్రౌండ్ వాటర్ ఉండేదని అభిప్రాయపడ్డారు. కల్వకుర్తి పూర్తి కెపాసిటీతో నీళ్లను నింపుకునే అవకాసం ఉండేదన్నారు. కానీ మూడేళ్లలో ఆ చిన్న పని కూడా చేయలేకపోయారని ప్రభుత్వాన్ని తప్పు పట్టారు. కానీ ఇప్పుడు కర్ణాటకను అడిగి నీళ్లు తెస్తున్నామని బిల్డప్ ఇస్తున్నారని, ఓ పక్క బిల్డప్ లు ఇస్తూనే మరోపక్క చంద్రబాబు కు నీళ్లను గిప్ట్ ప్యాక్ చేసి పంపిస్తున్నారని మండిపడ్డారు. రాష్ట్ర వ్యాప్తంగా రైతుల సమస్యలను ప్రభుత్వానికి తెలిపేందుకు నియోజకవర్గ టీఆర్ఎస్ ఇంఛార్జీలు ప్రతి గ్రామానికి వెళ్తారని కవిత చెప్పారు. కరవు సమస్యలను ప్రభుత్వానికి తెలిపేందుకు తాము ప్రత్యేక కార్యాచరణ చేపడతామని వెల్లడించారు. అదే విధంగా భవిష్యత్తులో స్కూళ్లలో బాత్ రూములు, కనీస సౌకర్యాలు ఉన్నాయో లేదా అన్న దానిపై కూడా పరిశీలనకు పార్టీ బృందాన్ని నియమిస్తామని తెలిపారు.

ఆపరేషన్ కోడ్ బ్లూ

ఆపరేషన్ కోడ్ బ్లూ పేరుతో రాష్ట్ర వ్యాప్తంగా హాస్పిటళ్లలో పరిస్థితులను టీఆర్ఎస్ పార్టీ నాయకులు తెలుసుకుంటున్నారని కవిత చెప్పారు. భూపాలపల్లి హాస్పిటల్లో సీలింగ్ కూలిన ఘటనను తామే వెలుగులోకి తెచ్చామని చెప్పారు. రిమ్స్ సంఘటనపై తాము పోరాటం చేస్తే ప్రభుత్వం అదే రోజు రూ.11 కోట్లు రిలీజ్ చేసిందని గుర్తు చేశారు. భూపాలపల్లి ఘటనకు సంబంధించి వీడియో తీసిన మా పార్టీ కార్యకర్తను పోలీసులు బెదిరిస్తున్నారని ఆగ్రహం వ్యక్తం చేశారు. ప్రజాసమస్యలపై పోరాటం చేస్తున్న వాళ్లను బెదిరించటం కాకుండా ప్రజలను ఇబ్బంది పెడుతున్న వాళ్లపై చర్యలు తీసుకునేలా పోలీసులు పని చేయాలని సూచించారు. 317 జీవో బాధితులను ఈ ప్రభుత్వం తీవ్రంగా ఇబ్బంది పెడుతున్నదని కవిత చెప్పారు. రూపాయి ఖర్చు లేకుండా తీర్చే సమస్యను కూడా మూడేళ్లుగా నానుస్తున్నారని అన్నారు. పైగా ఆందోళన చేస్తున్న టీచర్లను గాంధీ జయంతి రోజు ఈడ్చుకెళ్లి వారిపై లాఠీఛార్జ్ చేశారని ఆవేదన వ్యక్తం చేశారు. గాంధీ సిద్దాంతాలను పాటిస్తామని చెప్పే కాంగ్రెస్ పార్టీ గాంధీ జయంతి రోజే ఇలా చేయవచ్చా అని ప్రశ్నించారు. 317 బాధితుల్లో పోలీసులు కూడా ఉన్నారని.. వారికోసం కూడా మేమే పోరాటం చేయాల్సి ఉంటుందన్న విషయం అర్థం చేసుకోవాలని చెప్పారు. 

పేపర్ బ్యాలెట్లే నయం

 ఈవీఎంలు స్థానంలో పేపర్ బ్యాలెట్ తో ఎన్నికలు జరగాలని కవిత సూచించారు. అప్పుడు మాత్రమే పారదర్శకంగా ఎన్నికలు జరగుతాయని స్పష్టం చేశారు. అభివృద్ధి చెందిన అమెరికా, బ్రిటన్ లాంటి దేశాల్లోనూ పేపర్ బ్యాలెట్ ద్వానే ఎన్నికలు నిర్వహిస్తున్నారని గుర్తు చేశారు. ఈవీఎంలను మ్యానిపులేట్ చేసే అవకాశం ఉందని అభివృద్ధి చెందిన దేశాలు భావిస్తున్నాయని చెప్పారు. మళ్లీ దేశంలో పేపర్ బ్యాలెట్ విధానంలో ఎన్నికలు జరిగేందుకు టీఆర్ఎస్ పార్టీ తరఫున ఢిల్లీ వరకు వెళ్లి పోరాటం చేస్తామని వెల్లడించారు. సర్ ప్రక్రియలో జరిగిన తప్పిదాలకు సీఈసీ రాజీనామా చేస్తే సమస్య పరిష్కారం కాదని, టెంపరరీ సొలుష్యన్ కాకుండా వ్యవస్థలో మార్పు వచ్చే విధంగా పర్మినెంట్ సొల్యుషన్ ఉండాలన్నారు.

ఖైరతాబాద్ ఉప ఎన్నికకు ఇంకా సమయం పట్టవచ్చని కవిత అన్నారు. ఖైరతాబాద్ సహా రాష్ట్రంలో ఏ ఎన్నికలు వచ్చినా టీఆర్ఎస్ పోటీ చేస్తుందని స్పష్టం చేశారు. ఎన్నికలు అనేవి తమ పార్టీ అజెండా చెప్పుకునేందుకు ఓ అవకాశంగా భావిస్తామన్నారు.

The post Telangana Drought: K.Kavitha Demands Special Cabinet Meet, 24-Hour Free Power for Farmers appeared first on Telangana Jagruthi.