నామినేషన్లు వేసే వరకు ఓటరు నమోదుకు అవకాశం కల్పించాలి

తెలంగాణ సీఈఓను కోరిన తెలంగాణ రక్షణ సేన అధ్యక్షులు కల్వకుంట్ల కవిత

తమ పార్టీ రిజిస్ట్రేషన్ ప్రక్రియ త్వరగా పూర్తయ్యేలా సహకరించాలని విజ్ఞప్తి

(తెలంగాణ రక్షణసేన, హైదరాబాద్) :

గ్రాడ్యుయేట్ ఎమ్మెల్సీ ఎన్నికల ఓటరు నమోదు గడువు పొడగించాలని తెలంగాణ రక్షణ సేన చీఫ్ కల్వకుంట్ల కవిత డిమాండ్ చేశారు. సోమవారం హైదరాబాద్ బీఆర్ కేఆర్ భవన్ లో తెలంగాణ చీఫ్ ఎలక్టోరల్ ఆఫీసర్ (సీఈవో) సి. సుదర్శన్ రెడ్డితో ఆమె సమావేశమయ్యారు. ఈ సందర్భంగా ఓటరు నమోదు గడువు పొడగించాలని కోరుతూ వినతిపత్రం అందజేశారు. గ్రాడ్యుయేట్ ఓటరు నమోదు గడువు ఈనెల 6వ తేదీతో ముగుస్తుందని.. ఎన్నికల నోటిఫికేషన్ వచ్చి నామినేషన్ల ప్రక్రియ కొనసాగే వరకు ఓటరు నమోదుకు అవకాశం ఇవ్వాలని విజ్ఞప్తి చేశారు. 

సీఈవోతో సమావేశం అనంతరం కవిత మీడియాతో మాట్లాడారు. రాష్ట్రంలో ఎస్ఐఆర్ ప్రక్రియ ఈ నెల 21 వరకు కొనసాగుతుందని, గ్రాడ్యుయేట్ ఓటరు నమోదుకు ఈనెల 6వ తేదీతో గడువు ముగిసి పోతుందని పేర్కొనడం ఏమాత్రం సమంజసం కాదన్నారు. నామినేషన్ల ప్రక్రియ ముగిసే వరకు గ్రాడ్యుయేట్ ఓటరు నమోదు గడువు పొడగించాలని తమ సూచనకు సీఈవో అంగీకరించారని తెలిపారు. తమ లాంటి కొత్త పార్టీలకు తమ ఎజెండాను చెప్పుకోవడానికి గ్రాడ్యుయేట్ ఎమ్మెల్సీ ఎన్నికలు మంచి అవకాశమన్నారు. రాష్ట్రంలోని మూడింట రెండో వంతు ప్రాంతంలో ఎమ్మెల్సీ ఎన్నికలు జరుగుతున్న నేపథ్యంలో రాష్ట్రంలో ఎన్నికల వాతావరణం నెలకొన్నదని చెప్పారు. జెన్ జీలు, గ్రాడ్యుయేట్లు ఈ ఎన్నికలను సీరియస్ గా తీసుకొని ఎన్నికల ప్రక్రియలో పాల్గొనాలని కోరారు. ఎన్నికలు జరిగిన ప్రతిసారి గ్రాడ్యుయేట్ ఓటరు నమోదు ప్రక్రియ చేపడుతుండటం.. పోటీ చేసే అభ్యర్థులకు తలకు మించిన భారంగా మారుతుందని.. ఈ ప్రక్రియ మార్పు తీసుకురావాలని ఎన్నికల కమిషన్ ను కోరుతామన్నారు. ఎమ్మెల్సీ ఎన్నికల్లో పెద్ద విద్యాసంస్థల యజమానులు పోటీకి దిగుతుండటం.. వారి విద్యాసంస్థల్లోనే పెద్ద ఎత్తున ఓటరు నమోదు చేస్తుండటంతో ఎన్నికలు ఏకపక్షంగా జరుగుతున్నాయని.. వీటిపైనా ఎన్నికల కమిషన్ దృష్టి సారించాల్సిన అవసరం ఉందన్నారు. 

పార్టీ రిజిస్ట్రేషన్ ప్రక్రియకు సహకరించండి

తమ పార్టీ ‘‘తెలంగాణ రక్షణ సేన’’ రిజిస్ట్రేషన్ ప్రక్రియ కేంద్ర ఎన్నికల సంఘం వద్ద పెండింగ్ లో ఉందని, ఈ విషయంలో తమకు సహకరించాలని సీఈవోను కోరామని కవిత చెప్పారు. రాష్ట్రంలోని ప్రధాన ప్రతిపక్షాలకు ధీటుగా తమ ప్రజా సమస్యలపై పోరాడుతున్న తీరును నివేదిక రూపంలో కేంద్ర ఎన్నికల సంఘానికి అందించాలని సీఈవోను కోరామన్నారు. కొత్తగా పార్టీ ఏర్పాటు చేసినప్పటికీ అన్ని విభాగాల కమిటీలు ఏర్పాటు చేశామని, రాష్ట్ర వ్యాప్తంగా పెద్ద ఎత్తున పార్టీ కార్యాకలాపాలు నిర్వహిస్తున్న విషయాన్ని సీఈవో దృష్టికి తీసుకెళ్లామని అన్నారు.

The post Kalvakuntla Kavitha Demands Extension of Telangana Graduate MLC Voter Registration Deadline appeared first on Telangana Jagruthi.

ఆదివాసీలను ప్రత్యేక మతంగా నమోదు చేయడంపైనా తీర్మానం చేయాలి

సీఎం రేవంత్ రెడ్డికి తెలంగాణ రక్షణ సేన చీఫ్ కల్వకుంట్ల కవిత బహిరంగ లేఖ

(తెలంగాణ రక్షణ సేన, హైదరాబాద్) :

జనగణనలో ఓబీసీ కులగణన కాలమ్ చేర్చాలని కోరుతూ తెలంగాణ రాష్ట్ర అసెంబ్లీ, కౌన్సిల్ లో తీర్మానం చేయాలని తెలంగాణ రక్షణసేన అధ్యక్షులు కల్వకుంట్ల కవిత డిమాండ్ చేశారు. సీఎం రేవంత్ రెడ్డికి ఆదివారం బహిరంగ లేఖ రాశారు. ఆదివాసీల మతాన్ని నమోదు చేయడానికి జనగణనలో ప్రత్యేక కాలమ్ ఏర్పాటు చేయాలని అసెంబ్లీ, కౌన్సిల్ లో తీర్మానం చేయాలని డిమాండ్ చేశారు. డిసెంబర్ నుంచి ఇంటింటి జనగణన ప్రారంభమవుతున్న నేపథ్యంలో తెలంగాణ ప్రభుత్వం స్పందించాలని కోరారు. దేశానికి స్వాతంత్ర్యం వచ్చి 75 ఏళ్లు గడిచినా బీసీలకు జనాభా దామాషా ప్రకారం దక్కాల్సిన ఫలాలు అందడం లేదన్నారు. దేశవ్యాప్తంగా ఓబీసీలు ఎంత మంది ఉన్నారనే దానిపై చట్టబద్దమైన లెక్కలు లేకపోవడంతోనే వారికి ఫలాలు దక్కడం లేదని తెలిపారు.

జనగణనలో ఎస్సీ, ఎస్టీలను లెక్కించినట్టుగానే ఓబీసీలను లెక్కించాల్సిన అవసరం ఉందన్నారు. జనగణనలో కులాన్ని నమోదు చేసేందుకు ప్రత్యేక కాలమ్ ఉన్నప్పటికీ.. వారంతా ఓబీసీలకు చెందుతారని చెప్పడానికి ఎలాంటి కాలమ్ లేదని తెలిపారు. ఫలితంగా ఓబీసీ కులాల వారిని ఇతరుల కేటగిరిలో చేర్చుతారని.. దాంతో ఓబీసీల జనాభా ఎంత అనే దానిపై స్పష్టత లేకుండా పోతుందన్నారు. జనగణనలో ఓబీసీలను లెక్కించాలని డిమాండ్ చేస్తూ దేశవ్యాప్తంగా అనేక ఓబీసీ సంఘాలు ఆందోళనలు చేపట్టాయని వివరించారు. వారి ఆందోళనలను పరిగణలోకి తీసుకొని జనగణనలో ఓబీసీ కులాలను లెక్కించే ప్రత్యేక కాలమ్ ఏర్పాటు చేయాలని కోరుతూ వెంటనే తెలంగాణ అసెంబ్లీని, కౌన్సిల్ ను సమావేశాలు ఏర్పాటు చేయాలన్నారు.

దేశ మూలవాసులైన ఆదివాసీలది ప్రత్యేక జీవన శైలిని అని గుర్తు చేశారు. ప్రకృతిని, అడవిని తమ వేల్పుగా పూజించడం ఆదివాసీల ప్రత్యేకత అని తెలిపారు. ఒక్కో ఆదివాసీ తెగ ఒక్కో దేవతను, చెట్టును, పక్షిని, జంతువును పూజిస్తాయని.. గతంలో చేపట్టిన జనగణనలో వారిని ప్రత్యేక మతంగా నమోదు చేసే వారని తెలిపారు. జనగణనలో ఆదివాసీల మతం నమోదుకు ప్రత్యేక కాలమ్ లేకపోవడంతో ఆయా వర్గాల వారు ఆందోళనలో ఉన్నారని చెప్పారు. ఓబీసీల జనాభా లెక్క తేలాలన్నా, ఆదివాసీల మతాన్ని ప్రత్యేకంగా నమోదు చేయాలన్నా కేంద్ర ప్రభుత్వంపై ఒత్తిడి పెంచాల్సిన అవసరం ఉందన్నారు. ఇందుకోసం వెంటనే తెలంగాణ అసెంబ్లీ, కౌన్సిల్ ప్రత్యేక సమావేశాలు ఏర్పాటు చేసి ఓబీసీల కులగణన, ఆదివాసీల మతం నమోదుపై వేర్వేరు తీర్మానాలు చేసి కేంద్ర ప్రభుత్వానికి పంపాలని సూచించారు.

The post Kalvakuntla Kavitha Letter to Revanth Reddy | OBC Caste Census & Adivasi Religion in Census appeared first on Telangana Jagruthi.

పంటలు వేయవద్దన్న ముఖ్యమంత్రి అధికారంలో ఉండొద్దు

ఆదిలాబాద్ జిల్లాలో ఎకరం నీళ్లు ఇవ్వని బీఆర్ఎస్.. ఏ మొఖం పెట్టుకోని ఇక్కడ గర్జన సభ పెడుతుంది?

చనఖా – కొరాటా ప్రాజెక్టును రూ.368 కోట్ల నుంచి రూ. 2100 కోట్ల పెంచి భారీ అవినీతి చేశారు

ఈ సొమ్ము గుంటనక్క మింగిందా..  బీఆర్ఎస్ ఖాతాలో చేరిందా సమాధానం చెప్పాలి

సామాజిక న్యాయమని మాట్లాడటం కాదు.. చేతల్లో చేసి చూపిస్తున్నాం

రెండు ఎమ్మెల్సీ టికెట్లు బీసీలకే ఇచ్చాం

ఆదిలాబాద్ పాంచజన్య సంకల్పసభలో తెలంగాణ రక్షణసేన చీఫ్ కల్వకుంట్ల కవిత

(తెలంగాణ రక్షణసేన, ఆదిలాబాద్) :

తెలంగాణ రక్షణసేన పార్టీకి ఆదిలాబాద్ జిల్లా ప్రజలు, ఆదివాసీల దీవెనలు ఉండాలని..మీ ఆశీర్వాదం కోసమే ఈ జిల్లాకు వచ్చామని తెలంగాణ రక్షణసేన చీఫ్ కల్వకుంట్ల కవిత అన్నారు. ఉమ్మడి జిల్లాల్లో పాంచజన్య సంకల్ప సభల నిర్వహణలో భాగంగా శుక్రవారం ఆదిలాబాద్ జిల్లాలోని ఇంద్రవెల్లి వద్ద నిర్వహించిన పాంచజన్య సంకల్ప సభలో ఆమె ప్రసంగించారు. ఈ సందర్భంగా ఇంద్రవెల్లి ఘటనను గుర్తు చేసుకుంటూ ఆవేదన వ్యక్తం చేశారు. ఇంద్రవెల్లి పాపం కాంగ్రెస్ పార్టీదేనని విమర్శించారు. పంటలు కాపాడుకునేందుకు మీటింగ్ పెట్టుకోవాలనుకున్న ఆదివాసీలను కనికరం లేకుండా పిట్టలను కాల్చినట్లు కాల్చి చంపింది కాంగ్రెస్ ప్రభుత్వమేనని గుర్తు చేశారు. అయిన సరే కాంగ్రెస్ పార్టీ నేతలు క్షమాపణ కోరి ఇంద్రవెల్లి వీరులకు న్యాయం చేస్తామని హామీ ఇవ్వటంతో ఇక్కడి ప్రజలు పెద్ద మనసు చేసుకోని ఆ పార్టీకి నాలుగు సీట్లు ఇచ్చారన్నారు. అయిన సరే కాంగ్రెస్ పార్టీ ఆదిలాబాద్ జిల్లాను మోసం చేసిందని మండిపడ్డారు. తెలంగాణ సాధించుకుని 12 ఏళ్లు అవుతున్నా ఆదిలాబాద్ జిల్లాలో అభివృద్ధి లేదని, 750 ఊళ్లలో కనీసం స్కూళ్లు లేని పరిస్థితి ఉందన్నారు. తలసరి ఆదాయంలో ఆదిలాబాద్ జిల్లా చాలా వెనుకబడి ఉందని,  ఈ ప్రాంతంలో రోడ్లు, ప్రాజెక్టులు, అభివృద్ధిని అటు బీఆర్ఎస్, ఇటు కాంగ్రెస్ పార్టీలు నిర్లక్ష్యం చేశాయన్నారు. అడవులు, ఆదివాసీలు సహజ సంపదతో ఉన్న ఈ జిల్లాను అభివృద్ధి చేసేందుకు రాజకీయ నాయకులకు మనసు రావటం లేదని ఆవేదన వ్యక్తం చేశారు. 12 ఏళ్లుగా తుమ్మిడి హెట్టి ప్రాజెక్ట్ పేరుతో ఇక్కడి ప్రజలను బీఆర్ఎస్, కాంగ్రెస్ లు మురిపించాయే తప్ప చేసిందేమీ లేదన్నారు. కాగజ్ నగర్ లో కాగజ్ నగర్ లో లక్షా 5 వేల ఎకరాలకు నీళ్లు రావల్సి ఉంటే 6 వేల ఎకరాలకు మాత్రమే నీళ్లు ఇచ్చారని ధ్వజమెత్తారు. ఏళ్లకు ఏళ్లుగా ప్రాజెక్టులను పెండింగ్ పెట్టారన్నారు. తుమ్మిడి హెట్టిని పూర్తి చేసి ఉంటే రెండున్నర లక్షల ఎకరాలకు నీళ్లు వచ్చేవని చెప్పారు. 

ఆదివాసీలు ఎక్కువగా ఉండే జిల్లాలో కనీసం వారిని పట్టించుకోవటం లేదని చెప్పారు. ఐటీడీఏ లో జీవో 57 తో సహా 27 జీవోలను మళ్లీ అమలు చేయాలని, 1972 లో ఆస్తులు కొనుక్కున్న ఆదివాసీలకు న్యాయం చేయాలని ఆమె డిమాండ్ చేశారు. రక్త హీనతతో బాధపడుతున్న ఆదివాసీల మహిళలకు పోషకాహారం అందిస్తామని అది కూడా చేయటం లేదంటూ ఆవేదన వ్యక్తం చేశారు. ఆదిలాబాద్ జిల్లాను పూర్తిగా నిర్లక్ష్యం చేశారని ఆగ్రహం వ్యక్తం చేశారు. నలుగురు కాంగ్రెస్, నలుగురు బీజేపీ ఎమ్మెల్యేలను గెలిపిస్తే ఆదివాసీలకు అన్యాయం చేస్తున్నారన్నారు. బీజేపీ ఎమ్మెల్యేలు ఇద్దరు ముఖ్యమంత్రిపై ఈగ వాలితే కూడా సహించటం లేదన్నారు. ప్రజలను అభివృద్ధి చేయాల్సింది మరిచి బీజేపీ మత రాజకీయాలతో గెలవాలని చూస్తోందని..ప్రజలు ఆ విషయాన్ని గ్రహించాలని కోరారు. మంచిర్యాల ఎమ్మెల్యే రౌడీ అని ఆయన మంత్రిని కూడా నియోజకవర్గంలోకి రానివ్వటం లేదని విమర్శించారు. ఆయన కారణంగా మంచిర్యాల ప్రజలకు నష్టం జరుగుతుందని ఆవేదన వ్యక్తం చేశారు. 

 పంటలు వేయవద్దన్న ముఖ్యమంత్రి అధికారంలో ఉండొద్దు

చరిత్రలో రైతులను పంటలు వేయవద్దని చెప్పిన మొదటి ముఖ్యమంత్రి రేవంత్ రెడ్డేనని కవిత అన్నారు. వ్యవసాయం మాత్రమే తెలిసిన రైతులను పంటలు వేయవద్దంటున్న ముఖ్యమంత్రి వారికి ఏ విధంగా న్యాయం చేస్తారో చెప్పాలని నిలదీశారు. పంటలు వేయొద్దన్న ముఖ్యమంత్రి పదవి ఉండొద్దన్నారు. అధికారంలోకి రాగానే ఆదిలాబాద్ జిల్లాకు నెలకు రెండుసార్లు వస్తానని చెప్పిన రేవంత్ రెడ్డి..మూడేళ్లలో రెండుసార్లు మాత్రమే ఇక్కడకు వచ్చారని ఆమె గుర్తు చేశారు. ఇంద్రవెల్లి వీరులకు రూ. 25 లక్షలు ఇస్తామన్న రేవంత్ రెడ్డి అధికారంలోకి వచ్చాక కేవలం రూ. 5 లక్షలు మాత్రమే ఇచ్చి చేతులు దులుపుకున్నారని ధ్వజమెత్తారు. ఇంద్రవెల్లి వీరులను కూడా మోసం చేసిన ఘనత కాంగ్రెస్ దేనని మండిపడ్డారు. ఆదిలాబాద్ జిల్లాకు రేవంత్ రెడ్డి ఇచ్చిన ఒక్క మాట నిలబెట్టుకోలేదని విమర్శించారు. కరవు వస్తుందని ఏడాది ముందే తెలిసినప్పటికీ పట్టించుకోకుండా..ఇప్పుడు మహారాష్ట్ర ముఖ్యమంత్రితో తుమ్మడి హెట్టిపై చర్చలు అంటూ హడావుడి చేస్తున్నారని మండిపడ్డారు. ఈ ముఖ్యమంత్రి వ్యవహారం ఇల్లు అంటుకున్నప్పుడే బాయి తవ్వుకున్నట్లు ఉందన్నారు. మహారాష్ట్రతో ఉన్న ఒప్పందం ప్రకారం 148 మీటర్ల నీళ్లు నిల్వ చేసుకుంటూ 152 మీటర్ల ఎత్తులో ప్రాజెక్ట్ కట్టాలని కోరారు. తుమ్మడి హెట్టి విషయంలో ఆదిలాబాద్ జిల్లా ప్రజలకు స్పష్టత ఇవ్వాలని ఆమె డిమాండ్ చేశారు. ఆదిలాబాద్ జిల్లాలో ఇరిగేషన్ ను పూర్తిగా నాశనం చేశారని..తాము డిమాండ్ చేస్తే గానీ చనఖా- కొరాటా ప్రాజెక్ట్ ముందుకు పడలేదని చెప్పారు. కాంగ్రెస్ పార్టీ అనేక కుట్రలు, మోసాలు చేస్తూ ప్రజలను వంచిస్తుందన్నారు. ఎన్నికల సందర్భంగా ప్రజలకు ఇచ్చిన హామీలు, ఆరు గ్యారంటీలు ఎప్పుడు అమలు చేస్తారని ప్రజలు ఎదురుచూస్తున్నారని చెప్పారు. 

బీఆర్ఎస్ ది గర్జన కాదు..తర్జన భర్జన

ఆదిలాబాద్ లో బీఆర్ఎస్ పార్టీ గర్జన సభ నిర్వహిస్తామని చెబుతోందని కానీ వారిది గర్జన కాదు..  తర్జన భర్జన అని కవిత ఎద్దేవా చేశారు. సిద్దిపేట, సిరిసిల్ల బాబుల అధిపత్యం కోసం నిర్వహిస్తున్న ఈ సభ కారణంగా క్యాడర్ లో అయోమయం నెలకొందన్నారు. పదేళ్లు అధికారంలో ఉండి ఆదిలాబాద్ కు ఒక్క ఎకరం నీళ్లు ఇవ్వని బీఆర్ఎస్..ఏ మొఖం పెట్టుకుని రైతు గర్జన సభ నిర్వహించటానికి వస్తుందని ప్రశ్నించారు. గర్జన సభ నిర్వహించనున్న బీఆర్ఎస్ వర్కింగ్ ప్రెసిడెంట్ కేటీఆర్ తన ప్రశ్నలకు సమాధానం చెప్పాలంటూ ఆయనకు పలు ప్రశ్నలు సంధించారు. స్వయంగా కేసీఆరే ఆదిలాబాద్ జిల్లాకు యూనివర్సిటీ ఇస్తానని మాట ఇచ్చినప్పటికీ ఎందుకు ఒక్క యూనివర్సిటీ, కనీసం ఇంజినీరింగ్ కాలేజ్ కూడా ఇవ్వలేదని ప్రశ్నించారు. సిర్పూర్ కాగజ్ నగర్ మిల్లు కోసం ప్రైవేట్ వ్యక్తులకు వెెయ్యి కోట్లు ఇచ్చి..కార్మికులకు ఎందుకు అన్యాయం చేశారో చెప్పాలన్నారు. పరిశ్రమల శాఖ మంత్రిగా ఉన్న కేటీఆర్..పత్తి ఎక్కువగా పండే ఆదిలాబాద్ లో టెక్స్ టైల్ పార్క్ ఏర్పాటు చేయకపోవటానికి కారణం ఏంటన్నారు. పదేళ్లలో సిమెంట్ కార్పొరేషన్ ఆఫ్ ఇండియాను, బోధన్ షుగర్ ఫ్యాక్టరీ ఎందుకు తెరిపించలేదో చెప్పాలని నిలదీశారు. సిమెంట్ కార్పోరేషన్ ఆఫ్ ఇండియా మూత పడటానికి బీఆర్ఎస్, కాంగ్రెస్, బీజేపీ లే కారణమని చెప్పారు. పదేళ్లు అధికారంలో ఉండి ఏడున్నర లక్షల ఎకరాలకు నీళ్లిచ్చే అవకాశం ఉండగా ఒక్క ఎకరాకు కూడా నీళ్లు ఇవ్వకపోవటం దుర్మార్గం కాదా అని ప్రశ్నించారు. తుమ్మిడి హెట్టి ని పూర్తి చేసి ఉంటే రెండున్నర లక్షల ఎకరాలకు నీళ్లు వచ్చేవని చెప్పారు. ఒక్క ఎకరాకు కూడా నీళ్లు ఇవ్వకుండా ఏ మొఖం పెట్టుకోని రైతు గర్జన సభ నిర్వహిస్తారని ప్రశ్నించారు. పైగా చనఖా కొరటా ప్రాజెక్టులో భారీ ఎత్తున అవినీతికి పాల్పడ్డారని.. రూ. 368 కోట్ల ప్రాజెక్ట్ కాస్ట్ ను ఏకంగా రూ.2100 కోట్లకు పెంచారని చెప్పారు. ఇంత పెద్ద ఎత్తున జరిగిన అవినీతి ని యువత ప్రశ్నించాలని కోరారు. ఈ అవినీతి సొమ్ము మాజీ మంత్రులు ఇంద్రకరణ్ రెడ్డి, జోగు రామన్న ఇళ్లకు పోయాయా..  లేదంటే గుంటనక్క మింగేసిందా..  లేక బీఆర్ఎస్ పార్టీ అకౌంట్ లోకి పోయాయా చెప్పాలంటూ కేటీఆర్ ను డిమాండ్ చేశారు. ఈ ప్రశ్నలకు సమాధానం చెప్పిన తర్వాత ఏ సభ అయినా పెట్టుకోండని.. లేదంటే ప్రజలు బీఆర్ఎస్ ను నమ్మరని అన్నారు. 

సామాజిక న్యాయం చేతల్లో చేసి చూపుతున్నాం

సామాజిక తెలంగాణ సాధించటమే టీఆర్ఎస్ లక్ష్యమని..ఆ లక్ష్యం దిశగా మాటల్లో కాకుండా చేతల్లో చూపిస్తున్నామని కవిత చెప్పారు. ఎమ్మెల్సీ ఎన్నికలకు సంబంధించి రెండు స్థానాలను తమ పార్టీ బీసీలకే ఇచ్చిందన్నారు. పొలిటికల్ బ్యాక్ గ్రౌండ్, ఆర్థిక బలం లేకపోయినా చదువు, సమాజం కోసం పనిచేసే యువకులకు తాము సీట్లిచ్చామన్నారు. బీసీలకు, యువతకు అవకాశం ఇస్తే రాజకీయాలు మారుతాయని, రాజకీయాలు మారితే రాష్ట్రం మారుతుందన్నారు. తెలంగాణ ప్రజలకు మేలు చేసేందుకే, ప్రజలను మోసం చేస్తున్న పార్టీలను ప్రశ్నించేందుకే కొత్త రాజకీయ శక్తిగా వచ్చామన్నారు. పాంచజన్యం పేరుతో కీలకమైన ఐదు అంశాలను తాము ప్రాధాన్యంగా పెట్టుకున్నామని చెప్పారు. ప్రజలకు ప్రైవేట్ లోనూ మెరుగైన ఉచిత విద్య, వైద్యం  ఇచ్చి చూపిస్తానని చెప్పారు. యువతకు వ్యాపారం చేసేందుకు రూ. 2 లక్షల నుంచి రూ. 20 కోట్ల వరకు ఋణాలు ఇస్తామన్నారు. రైతులకు అన్ని సౌకర్యాలతో పాటు వారికి గౌరవం దక్కేలా చర్యలు తీసుకుంటామని చెప్పారు. 

సభ గ్రాండ్ సక్సెస్ 

ఆదిలాబాద్ లోని ఇంద్రవెల్లి వద్ద నిర్వహించిన టీఆర్ఎస్ పాంచజన్య సంకల్ప సభ గ్రాండ్ సక్సెస్ అయ్యింది. ఈ సభకు పెద్ద ఎత్తున ఆదివాసీలు, జిల్లా ప్రజలు తరలివచ్చారు. తెలంగాణ రక్షణ సేన చీఫ్ కల్వకుంట్ల కవిత ఆదిలాబాద్ జిల్లాకు చేరుకోగానే ముందుగా ముత్నూర్ లో కొమురం భీమ్ విగ్రహానికి పూలమాల వేసి నివాళులు అర్పించారు. అనంతరం ఇంద్రవెల్లిలోని అమరుల స్థూపం వద్ద నివాళులు అర్పించి అక్కడి నుంచి ప్రత్యేక బస్సులో సభ ప్రాంగణానికి  అభిమానుల కేరింతలు, నృత్యాలు, డప్పుల కొలహలం మధ్య ర్యాలీగా తరలి వెళ్లారు. దారి పొడువునా ఆదివాసీలు కవితకు ఘనస్వాగతం పలికారు.

The post TRS Chief Kalvakuntla Kavitha Speaks at Adilabad Pancha Janya Sankalpa Sabha, Raises Farmers’ Issues, Irrigation and Adivasi Welfare appeared first on Telangana Jagruthi.

జనగణనలో ఓబీసీ కాలమ్ కోసం అసెంబ్లీలో తీర్మానం చేయాలి

ఓబీసీ కాలమ్ పెట్టకపోతే తెలంగాణలో జనగణనను అడ్డుకోవాలి

రిజర్వేషన్లు తొలగించేందుకు బీజేపీ సర్కారు కుట్ర

ఎస్సీ, ఎస్టీ, ఓబీసీలు ఐక్య పోరాటాలతో ఈ కుట్రను అడ్డుకోవాలి

హైదరాబాద్ ఓబీసీ డిక్లరేషన్ సభలో తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణసేన, హైదరాబాద్) :

రిజర్వేషన్ లే భవిష్యత్ తరాలకు మనం ఇచ్చే ఆస్తి అని తెలంగాణ రక్షణ సేన చీఫ్ కల్వకుంట్ల కవిత అన్నారు. జనగణనలో ఓబీసీ కాలమ్ పెట్టాలని డిమాండ్ చేస్తూ తెలంగాణ అసెంబ్లీలో తీర్మానం చేయాలని డిమాండ్ చేశారు. ఆల్ ఇండియా ఓబీసీ స్టూడెంట్స్ అసోసియేషన్, తెలంగాణ బీసీ రైట్స్ ఫోరమ్ సంయుక్తంగా బాగ్ లింగంపల్లిలోని ఆర్టీసీ కల్యాణ మండపంలో బుధవారం నిర్వహించిన హైదరాబాద్ ఓబీసీ డిక్లరేషన్ సభలో ఆమె పాల్గొని ప్రసంగించారు. తమిళనాడు ప్రభుత్వం మాదిరిగా మన రాష్ట్రంలోనూ అసెంబ్లీలో తీర్మానం చేయాలన్నారు. కేంద్రం అందుకు అంగీకరించకపోతే తెలంగాణలో జనగణనను నిర్వహించకుండా అడ్డుకోవాలని పిలుపునిచ్చారు. జనగణనలో ఓబీసీల కోసం ప్రత్యేక కాలమ్ తో పాటు డ్రాప్ డౌన్ బాక్స్ ఉండాల్సిందేనని చెప్పారు. ఇందుకోసం పార్టీలకు అతీతంగా అందరం కలిసి పోరాటం చేయాల్సి ఉందన్నారు. జనగణన కోసం కేంద్రం రూ.12 వేల కోట్లు ఖర్చు చేస్తుందని.. ఇంత ఖర్చు చేసి కూడా ఓబీసీల లెక్క ఎంత ఉందో తేల్చకపోవడం సరికాదన్నారు. జనగణనలో ఓబీసీ కాలమ్ చేర్చాలని డిమాండ్ చేస్తూ నవంబర్ లో ఢిల్లీలోని జంతర్ మంతర్ వద్ద ఓబీసీ సంఘాలు నిర్వహించే ధర్నాలో తాము పాల్గొంటామని ప్రకటించారు. మహిళ బిల్లు కోసం తాము ఢిల్లీలో పోరాడి విజయం సాధించామని.. ఇప్పుడు ఓబీసీల అంశంలోనూ అదే తరహాలో ఉద్యమించి కేంద్రం మెడలు వంచి జనగణనలో ఓబీసీల కోసం ప్రత్యేక కాలమ్ పెట్టేలా చేస్తామన్నారు. 

అసెంబ్లీలో తీర్మానం చేయాలి

కుల గణనలో ఓబీసీ కాలం చేర్చే విధంగా కేంద్రంపై తమిళనాడు తరహాలో ఒత్తిడి పెంచాల్సిన అవసరముందని అన్నారు. అక్కడి ప్రభుత్వం ఇందుకోసం అసెంబ్లీలో తీర్మానం చేసినట్టే మనం కూడా చేయాల్సి ఉందన్నారు. రేవంత్ రెడ్డి సర్కార్ ప్రత్యేకంగా అసెంబ్లీ సెషన్ ఏర్పాటు చేసి తీర్మానం చేసి కేంద్రానికి పంపాలని డిమాండ్ చేశారు. బీసీల విషయంలో రేవంత్ రెడ్డికి చిత్తశుద్ది లేదని అన్నారు. బీసీలకు 42 శాతం రిజర్వేషన్లు కల్పించే హామీని నిలబెట్టుకోవాలని తాము ఉద్యమిస్తేనే రాష్ట్ర ప్రభుత్వం దిగివచ్చిందని గుర్తు చేశారు. కానీ ఆ బిల్లు కేంద్రం వద్ద ఆగిపోయినా రేవంత్ రెడ్డి ప్రభుత్వంలో చలనం లేదన్నారు. బీసీ బిల్లుకు ఆమోదం కోసం ఢిల్లీకి అఖిలపక్షాన్ని తీసుకెళ్తామని సీఎం ప్రకటించారని.. ఆ తర్వాత సీఎం ఢిల్లీకి 30 సార్లకు పైగా వెళ్లినా అఖిలపక్షాన్ని మాత్రం తీసుకెళ్లలేదని చెప్పారు. జనగణనలో బీసీ కుల గణన అంశంలోనైనా ప్రభుత్వం చిత్తశుద్దితో పని చేయాలన్నారు. ఈ విషయంలో రాజకీయాలకు అతీతంగా అన్ని పార్టీలు ఒక్కటి కావాల్సిన అవసరముందన్నారు. కేంద్రం మన డిమాండ్ కు ఒప్పుకోకపోతే రాష్ట్రంలో జనగణన చేపట్టకుండా అడ్డుకోవాలని.. ఆ అధికారం రాష్ట్ర ప్రభుత్వానికి ఉందన్నారు. ఈ విషయంలో రాజకీయాలతో సంబంధం లేకుండా అందరూ ప్రభుత్వానికి సహకరిస్తారని అన్నారు. 

రిజర్వేషన్లు తీసేసే కుట్ర

కేంద్రంలో ఉన్న బీజేపీ సర్కార్ కు రిజర్వేషన్లంటే గిట్టదని.. ఇప్పుడున్న రిజర్వేషన్లనే తీసేసే కుట్ర చేస్తున్నారని కవిత ఆందోళన వ్యక్తం చేశారు. కుల గణనలో ఓబీసీ ల లెక్క తేలితే వారి జనాభాకు అనుగుణంగా రిజర్వేషన్లు ఇవ్వాల్సి వస్తుందని కావాలనే ప్రత్యేక కాలమ్ పెట్టటం లేదని చెప్పారు. బీసీ కులాలకు సంబంధించి ఒకే రాష్ట్రంలో ఒకే కులానికి నాలుగైదు పేర్లు ఉంటాయని.. ఇక దేశ వ్యాప్తంగా అయితే చాలా పేర్లుంటాయని చెప్పారు. అలాంటి పేర్లున్న కులాల జనాభా మొత్తాన్ని ఒకే కులం జనాభాగా చూపించాలన్నారు. లేదంటే బీసీల కులాల జనాభా తక్కువగా ఉండే పరిస్థితి వస్తుందన్నారు. రిజర్వేషన్లను దక్కించుకోవాలంటే ఎస్సీ, ఎస్టీ లతో కలిసి అందరం పోరాటం చేయాలన్నారు. బీసీల పోరాటంలో ఎస్సీ, ఎస్టీలను కలుపుకొని పోవటమేమిటంటూ కొందరు వింతగా మాట్లాడుతుండటం సరికాదని చెప్పారు. రిజర్వేషన్లను కాపాడుకోవాలంటే కచ్చితంగా ఎస్సీ, ఎస్టీ, బీసీ, మైనార్టీలు కలిసికట్టుగా పోరాటం చేయాల్సి ఉంటుందన్నారు. దేశ ప్రధాని మోడీ పేరుకు మాత్రమే ఓబీసీ అని..ఆయన ఓబీసీల కోసం చేసిందేమీ లేదన్నారు. కనీసం మనల్ని లెక్క పెట్టని వాళ్లు మనకు అధికారం ఇస్తారా? అని ప్రశ్నించారు. 

రిజర్వేషన్లే భవిష్యత్ తరాలకు మనమిచ్చే ఆస్తి

భవిష్యత్ తరాలకు మనమిచ్చే ఆమూల్యమైన ఆస్తి రిజర్వేషన్లేనని కవిత అన్నారు. భూములు, బంగారం ఉంటే ఒకటి రెండు తరాలకు మాత్రమే ఉంటాయని.. కానీ రిజర్వేషన్లు తరతరాలకు మేలు చేస్తాయన్నారు. బీసీల లెక్క తెలియకపోవటంతోనే వారికి అన్యాయం జరుగుతుందని చెప్పారు. ఈ దేశ బడ్జెట్ ఏడాదికి రూ. 50 లక్షల కోట్లు ఉంటే ఏటా బీసీలకు రూ. 2 వేల కోట్లు కూడా ఖర్చు చేయటం లేదని ఆవేదన వ్యక్తం చేశారు. అంటే ఒక్కో మనిషికి కనీసం ఒక్క బఠాణీ కూడా రాదన్నారు. అందుకే మన వాటా కోసం మనం దఫాదఫాలుగా పోరాటం చేయాలన్నారు. ముందుగా ఓబీసీల లెక్క తేలితే ఆ తర్వాత మన వాటా హక్కుల కోసం పోరాటం చేసే అవకాశం ఉంటుందన్నారు. ఇప్పటికే బీసీ రిజర్వేషన్ల బిల్లుకు కేంద్రం ఆమోదం తెలిపి ఉంటే  రేవంత్ రెడ్డి ఇచ్చానని చెప్పుకుంటున్న ప్రభుత్వ ఉద్యోగాల్లో సగం బీసీలకే వచ్చేవని.. బీఆర్ఎస్, కాంగ్రెస్ ప్రభుత్వాలు ఇచ్చిన 2 లక్షల ఉద్యోగాల్లో లక్ష బీసీలకే వచ్చేవని అన్నారు. బీసీల జనాభా ఎంత ఉందో లెక్కలు తేల్చకపోవడంతోనే వారికి అన్యాయం జరుగుతుందని చెప్పారు. 

రామ్ మనోహర్ లోహియా, కాన్షీరాం, కర్పూరీ ఠాకూర్, మూలాయం సింగ్ లాంటి ఎందరో బీసీల కోసం ఎంతో పోరాటం చేశారని.. అదే విధంగా జగదేవ్ ప్రసాద్ కుశ్వా లాంటి నాయకులు బీసీల కోసం ఎంతో కష్టపడ్డారని గుర్తు చేశారు. మధ్యప్రదేశ్ కు 4 రోజులు మాత్రమే డిప్యూటీ సీఎంగా ఉన్న జేపీ కుశ్వా బీసీల కోసం పోరాటం చేశారని.. ఆయనను పోలీసులు కాల్చి చంపారని తెలిపారు. వందలో 90 శాతం మంది అన్యాయానికి గురువుతారన్నారని.. వారికి న్యాయం చేయాలని ఆయన పోరాటం చేశారని గుర్తు చేశారు. ఈ దేశంలో 100 మంది అవకాశాలను 10 మంది మాత్రమే అనుభవిస్తూ మిగతా వారికి అన్యాయం చేస్తున్నారని చెప్పారు. ఈ పరిస్థితి పోవాలంటే పోరాటం చేయాల్సిందేనని కవిత చెప్పారు.

కవిత తెచ్చే సైక్లోన్ తో మోడీ కుర్చీ ఊడటం ఖాయం : ప్రొఫెసర్ సూరజ్ మండల్

తెలంగాణ రక్షణ సేన చీఫ్ కవిత తెచ్చే సైక్లోన్ తో ఓటు చోరీతో పాటు ఓబీసీలకు అన్యాయం చేస్తున్న ప్రధాని మోడీ అధికార పీఠం ఊడటం ఖాయమని బీపీ మండల్ మనవడు, ఢిల్లీ యూనివర్సిటీ ప్రొఫెసర్ సూరజ్ మండల్ అన్నారు. దేశంలో సగానికి పైగా ఉన్న ఓబీసీల కోసం పోరాటం చేసేందుకు ధైర్యంగా ముందుకొచ్చిన కవిత భవిష్యత్ లో తెలంగాణకు ముఖ్యమంత్రి కావటం ఖాయమన్నారు. ఓబీసీలకు న్యాయం జరగాలంటే పోరాటం చేయాల్సిందేనని చెప్పారు. సుప్రీంకోర్టు న్యాయమూర్తి, ప్రైమ్ మినిస్టర్ ఆఫీస్ లో ఉన్న అధికారుల్లో, కీలకమైన పోస్టుల్లో ఒక్కరూ కూడా ఓబీసీలు లేరని ఆవేదన వ్యక్తం చేశారు. ఓబీసీలకు ఈ ప్రభుత్వాలు ఇస్తున్న ప్రాధాన్యం ఏంటో గుర్తించాల్సిన అవసరం ఉందని చెప్పారు. కేంద్రంలో ఉన్న ప్రభుత్వాలు బీసీలను 42 ఏళ్ల పాటు మోసం చేశాయని తమిళనాడుకు చెందిన రైట్స్ ఆఫ్ ఓబీసీ పార్టీ అధ్యక్షుడు తిరు రత్న సభాపతి ఆవేదన వ్యక్తం చేశారు. దేశంలో సగానికి పైగా ఉన్న బీసీలకు వారి వాటాకు అనుగుణంగా అన్ని రంగాల్లో అవకాశాలు కల్పించాల్సిందేనని ఆయన డిమాండ్ చేశారు. సభలో దేశ వ్యాప్తంగా ఓబీసీల కోసం పోరాటం చేస్తున్న నాయకులు యెజ్జురప్ప, ధర్మేంద్ర కుశ్వాహ, ఉమేశ్ కొర్రం సకల, గీతిక, సునీల్ వర్మ, రైజా బీబీ, బన్సీ లాల్ నీలం కుమారి, విశ్వజిత్ రతోనియా తదితరులు పాల్గొన్నారు. 

హైదరాబాద్ ఓబీసీ డిక్లరేషన్ లోని అంశాలు

• దేశ వ్యాప్తంగా జనగణన చేపట్టాలి, అందులో ఓబీసీలకు ప్రత్యేక కాలమ్ ఏర్పాటు చేయాలి

• ప్రతి కులానికి ప్రత్యేకంగా యూనిక్ కోడ్ ఉండాలి

• ఓబీసీలకు విద్య, ఉద్యోగాలు, రాజకీయాల్లో జనాభా దామాషా ప్రకారం వాటా ఇవ్వాలి

• 1931 జనగణన ప్రకారం బీసీల జనాభా 52 శాతం.. దానికి అనుగుణంగా బీసీ రిజర్వేషన్లు 50 శాతం ఉండాలి

• 50 శాతం రిజర్వేషన్ల సీలింగ్ తీసేయాలి, 50 సీలింగ్ కారణంగా బీసీలకు నష్టం జరుగుతుంది

• బీసీ, ఎస్సీ, ఎస్టీ బ్యాక్ లాగ్ పోస్టులను ఎప్పటికప్పుడు భర్తీ చేయాలి

• విశ్వ విద్యాలయాల్లో సోషల్ జస్టిస్ ఉండాలి

• ప్రైవేట్ సెక్టార్ లో రిజర్వేషన్లు అమలు చేయాలి

• 42 శాతం తెలంగాణలో, మధ్యప్రదేశ్ లో 27 శాతం రిజర్వేషన్లు ఇవ్వాలి

The post Reservations Are the Most Valuable Gift to Future Generations: Kalvakuntla Kavitha at Hyderabad OBC Declaration Meeting appeared first on Telangana Jagruthi.

రెండో స్థానం నుంచి కూడా బీసీ అభ్యర్థిని ఖరారు చేసిన టీఆర్ఎస్ చీఫ్ కల్వకుంట్ల కవిత

ఎన్నికల అబ్జర్వర్, కో ఆర్డినేటర్ గా డాక్టర్ చిట్నేని రఘు

(తెలంగాణ రక్షణ సేన, హైదరాబాద్ )

తెలంగాణ రక్షణ సేన హైదరాబాద్ – రంగారెడ్డి – మహబూబ్ నగర్ గ్రాడ్యుయేట్ ఎమ్మెల్సీ అభ్యర్థిగా సీనియర్ జర్నలిస్ట్ ఆకాశ్ కొల్లూరును పార్టీ చీఫ్ కల్వకుంట్ల కవిత ప్రకటించారు. హైదరాబాద్ గ్రాడ్యుయేట్ ఎమ్మెల్సీ అబ్జర్వర్, కో ఆర్డినేటర్ గా పార్టీ సీనియర్ నాయకులు డాక్టర్ చిట్నేని రఘు ను నియమించారు 

వరంగల్ – ఖమ్మం – నల్గొండ స్థానం నుంచి బీసీ అభ్యర్థి నలమాస శ్రీకాంత్ గౌడ్ కు అవకాశం ఇచ్చిన కవిత రెండో స్థానంలోనూ బీసీ అభ్యర్థికే అవకాశం ఇచ్చారు. రెండు ఎమ్మెల్సీ స్థానాలకు స్ట్రాటజీ, వార్ రూమ్ ఇన్ ఛార్జిగా ప్రముఖ న్యాయవాది రామ్ కల్యాణ్ చల్లను నియమించారు. 

రెండు ఎమ్మెల్సీ స్థానాలకు ఉమ్మడి జిల్లాల వారీగా ఇన్ ఛార్జీలు

 హైదరాబాద్ – సురభి, మతీన్, బండారి మహేందర్ ముదిరాజ్

 రంగారెడ్డి – అర్చనా సేనాపతి 

 మహబూబ్ నగర్ – రంజిత్ గొంగళ్ల

 నల్గొండ – సుజిత్

 ఖమ్మం – గట్టు కరుణ

 వరంగల్ – మాడుగుల రాజిరెడ్డి

జర్నలిస్టుగా రెండు దశాబ్దాల ప్రస్తానం

హైదరాబాద్ గ్రాడ్యుయేట్ ఎమ్మెల్సీ స్థానం నుంచి అభ్యర్థిగా ప్రకటించిన ఆకాశ్ కొల్లూరు హైదరాబాద్ వాసి.  

నేషనల్ మీడియాలో రెండు దశాబ్దాలుగా జర్నలిస్టుగా సేవలందిస్తున్నారు. ఇండియా టుడే, రిపబ్లిక్ టీవీ, సీఎన్ఎన్ న్యూస్ 18, డెయిలీ హంట్ లాంటి ప్రముఖ మీడియా సంస్థల్లో పని చేశారు. బేగంపేట హైదరాబాద్ పబ్లిక్ స్కూల్ లో పాఠశాల విద్యాభ్యాసం చేసిన ఆకాశ్ ఉస్మానియా యూనివర్సిటీ నుంచి గ్రాడ్యుయేషన్ చేసి గోల్డ్ మెడల్ సాధించారు.

The post Kalvakuntla Kavitha Announces Akash Kolluru as Telangana Rakshana Sena’s Hyderabad MLC Candidate appeared first on Telangana Jagruthi.

అడవిలో తామే పులులమని అందరూ చెప్పుకుంటారు.. వారిని బంధించే వేటగాడు వచ్చాడనే విషయం గుర్తు పెట్టుకోండి

మానవత్వంతో కూడిన మార్పు హైదరాబాద్ లో రాలే

కనీసం తాగునీళ్లు ఇవ్వలేనోళ్లు విశ్వనగరం అని ప్రచారం చేసుకుంటున్నారు

గ్రేటర్ లోని మూడు కార్పొరేషన్లలో టీఆర్ఎస్ జెండా ఎగురవేస్తాం

(తెలంగాణ రక్షణ సేన, హైదరాబాద్) :

ఫేక్ అగ్రిమెంట్లు, ఫేక్ పెట్టుబడులతో నిర్వహిస్తున్న ఫేక్ గ్లోబల్ ఇన్వెస్ట్ మెంట్ సమ్మిట్ ను అడ్డుకుంటామని కాంగ్రెస్ ప్రభుత్వాన్ని తెలంగాణ రక్షణ సేన అధ్యక్షురాలు కల్వకుంట్ల కవిత హెచ్చరించారు. గతేడాది తెచ్చామని చెప్పుకుంటున్న ఆరున్నర లక్షల కోట్ల పెట్టుబడులకు సంబంధించిన శ్వేతప్రతాన్ని విడుదల చేయాలని లేదంటే డిసెంబర్ లో జరిగే గ్లోబల్ ఇన్వెస్ట్ మెంట్ సమ్మిట్ అడ్డుకుని తీరుతామని శుక్రవారం మియాపూర్ లో జరిగిన టీఆర్ఎస్ రాజధాని రణభేరి సభలో హెచ్చరించారు. హైదరాబాద్ అభివృద్ధికి పెట్టుబడులు కావాలని తాము కోరుకుంటున్నామని కానీ అబద్దాలు, నకిలీ పెట్టుబడులతో మోసం చేస్తే ఊరుకోమని హెచ్చరించారు.  మరికొన్ని రోజుల్లో బల్దియా ఎన్నికలు జరగనున్న నేపథ్యంలో శుక్రవారం జీహెచ్ఎంసీ, సైబరాబాద్, మల్కాజిగిరి కార్పొరేషన్ల పరిధిలోని పార్టీ ముఖ్య నాయకులు, క్యాడర్ తో రాజధాని రణభేరి సమావేశం నిర్వహించారు. ఈ సమావేశంలో బల్దియా ఎన్నికలకు సంబంధించి కేడర్ కు దిశానిర్దేశం చేశారు. అనంతరం సభలో మాట్లాడుతూ గ్రేటర్ లోని మూడు కార్పొరేషన్లలో టీఆర్ఎస్ జెండా ఎగరటం ఖాయమని ధీమా వ్యక్తం చేశారు. మూడు కార్పొరేషన్ల పరిధిలోని 300 డివిజన్లలో పోటీ చేస్తామని ఆమె చెప్పారు. కనీసం తాగటానికి కూడా మంచి నీళ్లు ఇవ్వనోళ్లు విశ్వనగరమంటూ ప్రచారం చేసుకుంటున్నారని..వీళ్లా హైదరాబాద్ ను న్యూయార్క్, లండన్ చేసేదంటూ ఎద్దేవా చేశారు. నగరంలో సరైన రోడ్లు, డ్రైనైజీ వ్యవస్థ, మంచి నీళ్లు ఇచ్చే పరిస్థితి కూడా లేదని.. దోమలు, కుక్కలు స్వైర విహారం చేస్తుంటే పట్టించుకున్న నాథుడే లేడని ఆవేదన వ్యక్తం చేశారు. వీధి లైట్లు ఎప్పుడు వెలుగుతాయో ఎవరికీ తెలియదని, సీనియర్ సిటిజన్స్ కు భద్రత, గౌరవం లేని పరిస్థితి ఉందన్నారు. హైదరబాద్ లో చెప్పులను ఏసీ షోరూమ్ లల్లో కూరగాయలు, చేపలను రోడ్లపై పెట్టి అమ్ముతున్నారన్నారు. ప్రజారోగ్యంపై ఈ ప్రభుత్వానికి సోయి లేదని విమర్శించారు. కూరగాయలు, చేపలు అమ్మే వారికి ఏసీ బండ్లను ఇవ్వాలని కోరారు. బస్తీ దవాఖానాల్లో డాక్టర్ల సంఖ్య పెంచాలని, ప్రతి డివిజన్ లో 24 గంటలు నడిచే హాస్పిటల్ ఉండాల్సిందేనని ఆమె డిమాండ్ చేశారు. ఫాగింగ్, రోడ్ల నిర్మాణంలో, కుక్కల బెడద నివారణ, చెత్త, డ్రైనేజీ నిర్వహణ ఇలా అన్నింటిలో అవినీతికి పాల్పడుతున్నారని మండిపడ్డారు. 

మానవత్వంతో కూడిన మార్పు రాలే

హైదరాబాద్ లో మానవత్వంతో కూడిన మార్పు రాలేదని కవిత ఆవేదన వ్యక్తం చేశారు. రూ. 10 వేలు జీతం వచ్చే వారైనా లక్ష రూపాయలు జీతం వచ్చే వారైనా సరే ఇబ్బందులు పడుతున్నారని చెప్పారు. రూపీ వ్యాల్యు తగ్గటం, ప్రభుత్వాలకు ముందుచూపు లేకపోవటంతో విపరీతంగా ధరలు పెరుగుతున్నాయన్నారు. ముఖ్యమంత్రి రేవంత్ రెడ్డి బ్రదర్స్ ల్యాండ్ గ్రాబింగ్ కారణంగా హైదరాబాద్ చుట్టు పక్కల పంటలు పండే భూమి కోల్పోతున్నామని చెప్పారు. రైతులు ఇచ్చిన భూములను అభివృద్ధి కోసం కాకుండా అవినీతి కోసం వాడుకుంటున్నారన్నారు. ఐటీ ఉద్యోగులు ఏఐ కారణంగా ఉద్యోగాలు కోల్పోయే పరిస్థితి వస్తే వారిని ఆదుకునేందుకు ఒక పాలసీ లేదని ఆవేదన వ్యక్తం చేశారు. హైదరాబాద్ ను ఐటీ నగరంగా నిలబెట్టిన ఐటీ ఉద్యోగులకు తాము అండగా ఉంటామని భరోసా ఇచ్చారు. హైదరాబాద్ లో చెత్త సేకరించే 50 వేల మంది ఉద్యోగులపై రేవంత్ రెడ్డి కన్నుపడిందని..వారికి నష్టం చేస్తూ రామ్ కీ సంస్థకు మేలు చేయాలని చూస్తున్నారని చెప్పారు. ఆ 50 వేల మంది కుటుంబాల పరిస్థితి ఏంటనీ ముఖ్యమంత్రిని ప్రశ్నించారు. వారికి నష్టం జరిగితే చూస్తూ ఊరుకోమని ముఖ్యమంత్రి ఇంటి ముందు చెత్తవేసి పోరాటం చేస్తామని హెచ్చరించారు. హైదరాబాద్ లో కొత్తగా ఒక్క ప్రభుత్వ స్కూల్ కూడా కట్టటం లేదని..కార్పొరేట్ స్కూళ్లకు మేలు చేసేందుకే ఇలా చేస్తున్నారని అన్నారు. సముద్రం లేని హైదరాబాద్ ను నిజాంలు పెర్ల్ సిటీ గా అభివృద్ధి చేస్తే ఈ ముఖ్యమంత్రి మాత్రం ప్రజలకు కనీస సౌకర్యాలు అందించటం లేదని ధ్వజమెత్తారు. బిర్యానీ, ఇరానీ ఛాయ్, ముత్యాలకు ప్రసిద్ధి చెందిన నగరాన్ని దోమలకు నిలయంగా, కుక్కకాట్లకు కేంద్రంగా మార్చేశారని ఆగ్రహం వ్యక్తం చేశారు. 

బంధించే వేటగాడు వచ్చాడనే విషయం గుర్తు పెట్టుకోండి

బీఆర్ఎస్ పార్టీ తాము షేర్ అని, కాంగ్రెస్ బబ్బర్ షేర్ అని చెప్పుకుంటున్నాయని కానీ ఆ పులులను బంధించే వేటగాడైన టీఆర్ఎస్ పార్టీ వచ్చిందన్న విషయాన్ని గుర్తు పెట్టుకోవాలని కవిత హెచ్చరించారు. ప్రజలకు చేయాల్సింది చాలా ఉందని అందుకోసం ఎంతో క్రమశిక్షణతో పనిచేయాలని పార్టీ కేడర్ కు ఆమె సూచించారు. ఎమ్మెల్యేలు, ఎంపీలు కావాలనుకునే వాళ్లు ప్రజలకు తమ ద్వారా న్యాయం జరుగుతుందని నమ్మకం కలిగించాలని చెప్పారు. టీఆర్ఎస్ అధికారంలోకి వచ్చాక హైదరాబాద్ లో అన్ని సౌకర్యాలు అందిస్తామని, ప్రజలకు ఉచిత విద్య, వైద్యం ఇస్తామన్నారు. ప్రజల కోసం పనిచేసే తమతో పెట్టుకోవద్దని ప్రత్యర్థి పార్టీలను హెచ్చరించారు. టీఆర్ఎస్ పార్టీ విధానాలను గల్లీ గల్లీకి వెళ్లి ప్రజలకు వివరించాలని పార్టీ కేడర్ కు సూచించారు. టీఆర్ఎస్ అధికారంలోకి వచ్చాక యూత్ కు 2 లక్షల నుంచి రూ. 20 కోట్ల వరకు రుణాలు ఇస్తామన్నారు. మహిళలు రాజకీయాల్లోకి రావాలని అప్పుడే రాజకీయాలు మారుతాయని చెప్పారు. పాతబస్తీ లో ఉన్న నాయకులు ముఖ్యమంత్రి గులామ్ గా కాకుండా ప్రజలకు గులామ్ గా ఉండాలన్నారు. పాతబస్తీ ప్రజలకు ఇచ్చిన అన్ని హామీలను నెరవేర్చాలని కోరారు. ముస్లింలను అన్ని పార్టీలు మోసం చేశాయని వారికి తాము మేలు చేస్తామని చెప్పారు. కొత్తగా వచ్చిన మన పార్టీ ఇతర పార్టీలతో పోల్చితే పది రెట్లు ఎక్కువ కష్టపడాలన్నారు.

The post TRS Rajadhani Ranabheri Sabha: Kalvakuntla Kavitha Warns Congress Over Global Investment Summit appeared first on Telangana Jagruthi.

నవంబర్ నెలాఖరులోగా కాఫర్ డ్యాం నిర్మించుకుంటే కన్నేపల్లి పంపు హౌస్ వద్ద ఆందోళన చేస్తాం

మేడిగడ్డను బూచీగా చూపి రైతులకు నష్టం చేయవద్దు

ప్రశ్నించి, పోరాడటమే కాకుండా ప్రభుత్వానికి పరిష్కార మార్గాలను  చెబుతున్నాం

-తెలంగాణ రక్షణ సేన చీఫ్ కల్వకుంట్ల కవిత

పార్టీ నాయకులతో కలిసి కన్నెపల్లి పంప్ హౌస్ వద్ద ప్రాణహిత ప్రవాహాన్ని పరిశీలించిన టీఆర్ఎస్ చీఫ్

(తెలంగాణ రక్షణ సేన, కాళేశ్వరం)

రాష్ట్రంలో కరవు పరిస్థితులను ఎదుర్కొని రైతులకు మేలు చేయాలంటే వెంటనే కన్నెపల్లి పంప్ హౌస్ వద్ద 93 మీటర్ల ఎత్తులో కాఫర్ డ్యామ్ నిర్మించి ప్రాణహిత నీళ్లను మళ్లించాలని తెలంగాణ రక్షణసేన చీఫ్ కల్వకుంట్ల కవిత ప్రభుత్వానికి సూచించారు. కేవలం రూ. 25 కోట్లు ఖర్చు చేస్తే నెలన్నర రోజుల్లో ఈ డ్యామ్ ను పూర్తి చేయవచ్చన్నారు. సోమవారం కన్నెపల్లి పంప్ హౌస్ ను టీఆర్ఎస్ పార్టీ నాయకులతో కలిసి ఆమె సందర్శించారు. అక్కడ నీటి ప్రవాహాన్ని పరిశీలించిన తర్వాత పవర్ పాయింట్ ప్రజేంటేషన్ ద్వారా కాఫర్ డ్యామ్ నిర్మాణం ఎక్కడ చేపట్టవచ్చొ…దాని ద్వారా ఎలాంటి ప్రయోజనం ఉంటుందో వివరించారు. రాష్ట్రంలో ఎంతటి కరువు పరిస్థితులున్న సరే ప్రాణిహిత నదిలో రోజుకు రెండు టీఎంసీల నీళ్లు ప్రవహిస్తుంటాయన్నారు. ఆ నీటిని సరిగా వాడుకుంటే చాలని చెప్పారు. నవంబర్ లోగా కాఫర్ డ్యామ్ నిర్మించాలని రైతుల తరఫున ప్రభుత్వానికి వినమ్రంగా విజ్ఞప్తి చేస్తున్నామని..వినకపోతే  ప్రభుత్వం మెడలు ఎలా వంచాలో తమకు తెలుసని అన్నారు. మేడిగడ్డ బూచిని చూపి రైతులకు నష్టం చేస్తే ఊరుకోమని హెచ్చరించారు. కరువు కోరల్లో చిక్కుకున్న రాష్ట్రాన్ని గట్టెక్కించేందుకు తాము ఎంతో అధ్యయనం చేసి నిపుణులతో మాట్లాడి కాఫర్ డ్యామ్ నిర్మాణమే సొల్యుషన్ అని గుర్తించామన్నారు. ఇందుకు సంబంధించిన టెక్నికల్ డీయిటెల్స్ ను కూడా ప్రభుత్వానికి ఇస్తామన్నారు. తామిచ్చిన సూచనను నిపుణులతో మాట్లాడి ప్రభుత్వం పరిశీలించాలని..ఈ విషయంలో ఏదైనా మార్పులు ఉన్నా సరే తాము అంగీకరిస్తామన్నారు. ఎట్టి పరిస్థితుల్లో రైతులకు నష్టం జరగకూడదనేది తమ తాప్రయతమని చెప్పారు. వెంటనే ప్రభుత్వం ఈ పనులను చేపట్టి కరవు కోరల్లోంచి బయటపడే ప్రయత్నం చేయాలన్నారు.

ప్రశ్నించటమే కాదు పరిష్కారం చూపిస్తాం

ప్రభుత్వాన్ని ప్రశ్నించటమే కాకుండా పోరాటం చేస్తూ పరిష్కారానికి కూడా తామే మార్గం చెబుతామని కవిత అన్నారు. ఇతర పార్టీల మాదిరిగా రెండు రోజులు హడావుడి చేసి టీవీల్లో కనిపించటం తమ ఉద్దేశం కాదని చెప్పారు. కరవు నుంచి బయటపడాలంటే ఏం చేయాలన్న దానిపై నిపుణులతో మాట్లాడిన తర్వాతే కాఫర్ డ్యామ్ అనే ఆలోచన చేశామన్నారు. అదే విధంగా రాష్ట్రంలో నవంబర్ వరకు రైతులకు నీళ్లు, కరెంట్ ఎట్టి పరిస్థితుల్లో ఇవ్వాల్సిందేనని చెప్పారు. కరవు పరిస్థితులను ముందే గ్రహించి కొన్ని రోజుల క్రితమే రైతులకు నవంబర్ వరకు ఉచిత కరెంట్ ఇవ్వాలని తామే డిమాండ్ చేశామని గుర్తు చేశారు. తాము కోరిన తర్వాతే ముఖ్యమంత్రి ఈ అంశంపై స్పందించి కేంద్రాన్ని కరెంట్ అడుగుతామని చెప్పారన్నారు. రాష్ట్రంలో ప్రస్తుతం కోటి 10 లక్షల ఎకరాల పంటకు నీళ్లు, కరెంట్ అవసరం ఉందని చెప్పారు. నవంబర్ చివరి వరకు కరెంట్, నీళ్లు ఇచ్చి రైతుల పంటలను కాపాడాలని కోరారు. ప్రతిపక్షాలంటే ఓ వైపు ప్రభుత్వంపై పోరాటం చేస్తూనే సమస్య పరిష్కారానికి సొల్యుషన్ కూడా చెప్పాలన్నారు. ప్రశ్నించు, పోరాడు, పరిష్కారించు అనే నినాదంతో ఆ పనిని తమ పార్టీ చేస్తుందని చెప్పారు. కరెంట్, నీళ్లు ఇచ్చే పరిస్థితి ఉన్నప్పటికీ కాంగ్రెస్ ప్రభుత్వం నిర్లక్ష్యంగా వ్యవహరిస్తుందని..ఈ విషయాన్ని రాష్ట్రంలోని ప్రతి రైతుకు తెలిసేలా చేయాలని పార్టీ శ్రేణులకు పిలుపునిచ్చారు. 

తెలంగాణ వచ్చాక కూడా నీళ్ల విషయంలో న్యాయం జరగలే

తెలంగాణ రాష్ట్రం వచ్చి 13 ఏళ్లు గడుస్తున్నప్పటికీ కూడా మనం మన వాటా నీళ్లను సంపూర్ణంగా వాడుకోలేని దుస్థితిలో ఉన్నామని కవిత ఆవేదన వ్యక్తం చేశారు. మా నీళ్లు మాకేనంటూ పిడికిలెత్తి తెలంగాణ ఉద్యమం చేసిందే నీళ్ల కోసమని గుర్తు చేశారు. కానీ తెలంగాణ వచ్చాక కూడా మన నీళ్లను మనం వాడుకోలేకపోతున్నామన్నారు. నిజానికి మనకున్న రెండు పెద్ద నదులైన గోదావరి, కృష్ణా నీళ్లను సరిగా వాడుకుంటే రాష్ట్రంలో కరవు అనే పరిస్థితే ఉండదని చెప్పారు. కానీ బీఆర్ఎస్ ప్రభుత్వం లక్షా 80 వేల కోట్లు ఖర్చు చేసి కృష్ణా నది పరివాహంలో 4 నుంచి 5 లక్షలు, గోదావరి లో లక్ష ఎకరాలకు మాత్రమే కొత్తగా నీళ్లు ఇచ్చిందని చెప్పారు. కాళేశ్వరం కోసం 93 వేల కోట్లు ఖర్చు చేసినప్పటికీ పాత ఆయకట్టు స్థిరీకరణ, వరద ప్రవాహం కోసం మాత్రమే వాటిని ఖర్చు చేశారన్నారు. కాళేశ్వరం కాలువలను పూర్తి చేయాలంటే మరో 50 వేల కోట్లు ఖర్చు చేయాల్సి ఉంటుందన్నారు. బీఆర్ఎస్ ప్రభుత్వంలో ఆ పరిస్థితి ఉంటే కాంగ్రెస్ వచ్చాక పరిస్థితి మరింత దిగజారిందన్నారు. రూ. 26 వేల కోట్లు ఖర్చు చేసి తట్టెడు మట్టి కూడా ఎత్తలేదని ధ్వజమెత్తారు. అడిగితే పాత బకాయిలు చెల్లించామని చెబుతున్నారని,  ఫీజు రీయింబర్స్ మెంట్, దళిత బంధు లాంటి బకాయిలు ఎందుకు చెల్లించటం లేదని ప్రశ్నించారు. మేడిగడ్డ బూచి చూపించి రైతులకు అన్యాయం చేయవద్దని..వెంటనే కాఫర్ డ్యామ్ పనులు చేపట్టాలని కోరారు. అదే విధంగా మేడిగడ్డ బ్యారేజ్ పనులను పూర్తి చేసేందుకు కూడా ఇదే మంచి సమయమని వెంటనే ఆ పనులను కూడా పూర్తి చేయాలన్నారు. ఇప్పటికే రాష్ట్రంలో 21 వేల చెరువులు ఎండిపోయి రైతులు, ముదిరాజ్ లు, బెస్త సోదరులు బాధలో ఉన్నారని చెప్పారు. వచ్చే పది నెలలు ఇంకా భయంకరమైన పరిస్థితులుంటాయని..వాటి నుంచి బయటపడేందుకు తామిచ్చిన సూచనను ప్రభుత్వం సీరియస్ గా పరిశీలించాలన్నారు. 

చిన్న కాళేశ్వరం పూర్తి చేయాలి

మంథని నియోజకవర్గంలో చిన్న కాళేశ్వరం ప్రాజెక్ట్ ను వెంటనే పూర్తి చేయాలని కవిత డిమాండ్ చేశారు. మంత్రి శ్రీధర్ బాబు ఇక్కడ ప్రజలకు చిన్న మాటను నిలబెట్టుకోవాలని కోరారు. అదే విధంగా ముంపు బాధితులకు సరైన పరిహారం కల్పించాలన్నారు. పదేళ్లు ప్రతిపక్షం ఉన్న సమయంలో ప్రజలకు మాటిచ్చిన శ్రీధర్ బాబు అధికారంలోకి వచ్చి మూడేళ్లు గడిచిన ఎందుకు మాట నిలబెట్టుకోవటం లేదని ప్రశ్నించారు. కార్యక్రమంలో మాజీ మంత్రి బోడ జనార్దన్, పార్టీ సీనియర్ నాయకులు రియాజ్ అహ్మద్, సయ్యద్ ఇస్మాయిల్, నవీన్ కుమార్, లోక రవిచంద్ర, వెంకట్, నరేశ్ నేత తదితరులు పాల్గొన్నారు.

The post Pranahita Water: Kalvakuntla Kavitha Demands Cofferdam Before November End | Will Protest at Kannepalli Pump House appeared first on Telangana Jagruthi.

కేంద్రం నిధులు ఇచ్చినా వేతనాల్లో కోతలు పెట్టడం  సరికాదు

ఉద్యోగుల పట్ల రాష్ట్ర ప్రభుత్వ వివక్ష

-తెలంగాణ రక్షణ సేన చీఫ్ కల్వకుంట్ల కవిత 

(తెలంగాణ రక్షణ సేన, హైదరాబాద్) :

నేషనల్ హెల్త్ మిషన్ (ఎన్ హెచ్ఎం) ఉద్యోగుల జీతాలు తగ్గిస్తూ ప్రభుత్వం జీవో 1195 తేవడం అన్యాయమని తెలంగాణ రక్షణ సేన చీఫ్ కల్వకుంట్ల కవిత మండిపడ్డారు. ఎన్ హెచ్ఎం ఉద్యోగుల జేఏసీ నాయకులతో కలిసి ఆదివారం బంజారాహిల్స్ లోని పార్టీ కార్యాలయంలో ఆమె మీడియాతో మాట్లాడారు. రాష్ట్ర వ్యాప్తంగా 17 వేల ఉద్యోగులుంటే వారిలో కొంతమంది వేతనాలు రూ. 4 వేల నుంచి రూ.5 వేలు తగ్గించారని అన్నారు. ఒక వైపు ధరలు పెరుగుతూ, కరవు పరిస్థితులు నెలకొని ఉన్నాయని.. ద్రవ్యోల్బణం నానాటికి పెరుగుతూ ఉంటే ఉద్యోగుల జీతాలు తగ్గిస్తారా అని ప్రశ్నించారు. 

కొందరి జీతాలు తగ్గించి మరికొందరి వేతనాలు మాత్రం  పెంచారని.. ఉద్యోగుల పట్ల ఇంత వివక్ష ఎందుకని ప్రశ్నించారు. ఉద్యోగుల కోసం కేంద్రం నిధులు ఇస్తున్నా రాష్ట్ర ప్రభుత్వం సమయానికి వేతనాలు ఇవ్వడం లేదన్నారు. ఎన్ హెచ్ఎం ఉద్యోగుల శ్రమను దోచుకుంటే ఊరుకునేది లేదని హెచ్చరించారు. ఈ విషయంలో ముఖ్యమంత్రి రేవంత్ రెడ్డి వెంటనే స్పందించాలని డిమాండ్ చేశారు. ఎన్ హెచ్ఎం ఉద్యోగుల విషయంలో ఏం జరిగిందో రివ్యూ చేసి ఉద్యోగుల జీతాలు పెంచాలని హెల్త్ మినిస్టర్ కు ఆదేశాలివ్వాలని డిమాండ్ చేశారు. ఉద్యోగులకు ఏటా 5 శాతం జీతాలు పెంచాలని కేంద్ర నిబంధనల్లో ఉన్నప్పటికీ జీతాలు తగ్గించడం ఏమిటని ప్రశ్నించారు.

ఉద్యోగులను రెగ్యులరైజ్ చేయాలి

ఎన్ హెచ్ఎం ఉద్యోగులను రెగ్యులరైజ్ చేస్తామని హామీ అధికారంలోకి వచ్చిన కాంగ్రెస్ ఇప్పుడు వారికి న్యాయం చేయడం లేదన్నారు. దేశంలోని ఏడు రాష్ట్రాల్లో ఎన్ హెచ్ఎం ఉద్యోగులను రెగ్యులరైజ్ చేశారని.. అందులో కాంగ్రెస్ అధికారంలో ఉన్న హిమాచల్ ప్రదేశ్ కూడా ఉందన్నారు. ఏపీలో 30 శాతం జీతాలు పెంచడంతో పాటు రెగ్యులరైజ్ చేస్తామని అసెంబ్లీలో తీర్మానం చేశారని గుర్తు చేశారు. తెలంగాణలో ఎన్ హెచ్ఎం ఉద్యోగులకు ఇవ్వాల్సిన నిధులను పక్క దారి పట్టిస్తున్నారని మండిపడ్డారు. వెంటనే ఉద్యోగులందరి జీతం పెంచి.. రెగ్యులరైజ్ చేయాలని డిమాండ్ చేశారు.

ప్రజా ఉద్యమం తప్పదు

గ్రామీణ ఆరోగ్య వ్యవస్థకు ఎన్ హెచ్ఎంలు ఎంతో కీలకమని అన్నారు. వ్యాక్సినేషన్ తో పాటు రాష్ట్ర ప్రజలకు స్థానికంగా వైద్య సేవలు అందిస్తున్నామని గుర్తు చేశారు. ఎన్ హెచ్ఎం ఉద్యోగులు ఒక్క రోజు పని మానేస్తే గ్రామీణ ఆరోగ్య వ్యవస్థ దెబ్బ తింటుందనే విషయం గుర్తు పెట్టుకోవాలన్నారు. వేతనాల తగ్గింపుపై ఉద్యోగుల ధర్నా చేస్తామని కోరినా పర్మిషన్ ఇవ్వడం లేదన్నారు. వైద్య ఆరోగ్య శాఖ మంత్రి వారికి  అపాయింట్ మెంట్ కూడా ఇవ్వకపోవడం దారుణం అన్నారు. ఉద్యోగుల  సమస్యలు వెంటనే పరిష్కరించాలని డిమాండ్ చేశారు. లేదంటే తాము రంగంలోకి దిగి పెద్ద ఎత్తున వారి తరఫున ప్రజా పోరాటాలు చేస్తామని హెచ్చరించారు.

The post NHM Employees’ Salary Cuts Are Unfair | Kalvakuntla Kavitha Questions Government appeared first on Telangana Jagruthi.

ప్రెస్ మీట్ పెట్టి తన వైఫల్యాన్ని చెప్పుకున్న సీఎం

రేవంత్ రెడ్డి అవగాహన రాహిత్యంతోనే ఈ దుస్థితి

రైతు కూలీలకు ఏడాదికి రూ. 12 వేలు ఇవ్వడంతో పాటు ఇన్సూరెన్స్ చేయించాలి

రాష్ట్రం కరవులో ఉంటే సీఎం యాదాద్రి పవర్ ప్లాంట్ ను ప్రైవేటీకరించే ప్రయత్నం చేస్తున్నడు

పవర్ మ్యాక్స్ కంపెనీతో ఉన్న ఒప్పందం ఏమిటో బయట పెట్టాలి

-తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణ సేన, హైదరాబాద్) :

ఎల్ నినోతో కరవు వస్తుందని శాస్త్రవేత్తలు ముందే హెచ్చరించినా ముందస్తు చర్యలు చేపట్టడంలో సీఎం రేవంత్ రెడ్డి అట్టర్ ఫ్లాప్ అయ్యారని తెలంగాణ రక్షణ సేన చీఫ్ కల్వకుంట్ల కవిత మండిపడ్డారు. శుక్రవారం బంజారాహిల్స్ లోని తెలంగాణ రక్షణసేన కార్యాలయంలో ఆమె మీడియాతో మాట్లాడారు. ఈ ఏడాది జనవరి నుంచే ఎల్ నినో ఎఫెక్ట్ తో తీవ్రమైన కరవు వచ్చే ప్రమాదముందని హెచ్చరించినా కనీస చర్యలు చేపట్టలేదన్నారు. దొంగలు పడిన ఆరు నెలలకు ఏమో అన్నట్లుగా ఇప్పుడొచ్చి రైతులు త్యాగాలు చేయాలని నీతులు వల్లించడం సిగ్గుచేటు అన్నారు. కరవు విషయంలో తాను ఏమీ చేయలేనని సీఎం రేవంత్ రెడ్డి నిస్సహాయతను వ్యక్తం చేస్తూ చేతులెత్తేశారని మండిపడ్డారు. పాలకుడికి దూరదృష్టి ఉండాలని.. సీఎంలో అది లోపించిందని అన్నారు. పరిస్థితి మొత్తం చేయి దాటి పోయిన తర్వాత  వచ్చి రైతులు త్యాగాలు చేయాలని మాట్లాడటం దారుణమన్నారు. ఆగస్టులో 28 శాతం లోటు వర్షపాతం నమోదు అయ్యిందని.. అప్పుడే అప్రమత్తమై ఉంటే పరిస్థితి వేరేలా ఉండేదన్నారు. పక్క రాష్ట్రాలు కరవు మండలాలను ప్రకటించి కేంద్రానికి ఇప్పటికే నివేదిక పంపాయని గుర్తు చేశారు. తెలంగాణ సీఎం మాత్రం నిర్లక్ష్యంగా వ్యవహరించి ఇప్పుడు నింపాదిగా రివ్యూలు అంటూ కాలం వెళ్లదీసే ప్రయత్నాలు చేస్తున్నారని ఆగ్రహం వ్యక్తం చేశారు.

ప్రభుత్వం, ముఖ్యమంత్రి ముందే మేల్కొని ముందస్తుగా చర్యలు చేపట్టి ప్రజలకు ఇబ్బందులు తప్పేవన్నారు. మన ముఖ్యమంత్రికి ప్రజల మీద శ్రద్ధ, సమస్యల మీద ఫోకస్ లేదని ధ్వజమెత్తారు. రేవంత్ రెడ్డి అధికారంలోకి వచ్చి దాదాపు మూడేళ్లు అవుతుందని.. ఇప్పటి వరకు పాలమూరు-రంగారెడ్డి పూర్తి చేయలేదని, మేడిగడ్డ బ్యారేజ్ ను కూడా రిపేర్ చేయలేదని అన్నారు. వాటిని పూర్తి చేసి ఉంటే ఇవ్వాళ రాష్ట్రానికి ఈ పరిస్థితి వచ్చేది కాదన్నారు. గత బీఆర్ఎస్ ప్రభుత్వం రూ.1.86 లక్షల కోట్లు ఖర్చు చేసినా ప్రాజెక్టులు పూర్తి కాలేదని, కాంగ్రెస్ ప్రభుత్వం అధికారంలోకి వచ్చాక రూ. 26 వేల కోట్లు ఖర్చు చేసినప్పటికీ ఒక్క ఎకరానికి కూడా కొత్తగా నీళ్లు ఇవ్వలేదన్నారు. మేడిగడ్డ బ్యారేజ్ రిపేర్లు చేసుకోవడానికి ఇదే సరైన సమయమని.. వచ్చే వర్షాకాలంలోగా ఆ పనులు పూర్తి గోదావరి నీళ్లను వినియోగంలోకి తేవాలని డిమాండ్ చేశారు. ఇంకా ఎన్నాళ్లు గత ప్రభుత్వాన్ని తిడుతూ టైమ్ చేస్తారని ప్రశ్నించారు. తిట్టుడు బంద్ చేసి కట్టుడు షురూ చేయాలని సూచించారు. బీఆర్ఎస్ ప్రభుత్వం ఒక్క ఏడాదికి కృష్ణా నీళ్ల ఒప్పందం కుదుర్చుకుంటే ఆ వంకతో తెలంగాణ ప్రయోజనాలను దెబ్బ తీసే విధంగా ఏపీకి కృష్ణా నీటి ధారాదత్తం చేస్తున్నారని ఆవేదన వ్యక్తం చేశారు. పాలమూరు బిడ్డ అయి ఉండి కనీసం భీమా, నెట్టంపాడు ప్రాజెక్ట్ లను కూడా పూర్తి చేయకపోవటం అన్యాయమన్నారు. బీఆర్ఎస్ తప్పులను ఎత్తి చూపి అధికారంలోకి వచ్చిన రేవంత్ రెడ్డి ఇప్పుడు అవే తప్పులు చేస్తున్నారని ఆగ్రహం వ్యక్తం చేశారు. 

రాష్ట్రానికి శాపంగా సీఎం అనుభవ లేమి

సీఎం రేవంత్ రెడ్డి అనుభవలేమి రాష్ట్రానికి శాపంగా మారిందని మండిపడ్డారు. నీళ్ల విషయంలో, కరవును ఎదుర్కొనే విషయంలో సీఎం ఏమాత్రం ముందు చూపుతో వ్యవహరించలేదన్నారు. రైతులను త్యాగాలు చేయాలంటున్న ముఖ్యమంత్రి వారికి పరిహారం ఏం ఇస్తారో మాత్రం చెప్పడం లేదన్నారు. పంట నష్టపోయిన వారికి ఎకరానికి రూ.10 వేలు ఇస్తామని లీకులు ఇస్తున్నారే తప్ప ముఖ్యమంత్రి స్పష్టమైన ప్రకటన చేయడం లేదన్నారు. యాసంగిలో పంటలు సాగు చేయకపోతే రైతు కూలీలు ఆగమయ్యే పరిస్థితి ఉంటుందని ఆందోళన వ్యక్తం చేశారు. కూలీలే కాదు, రైతులు సైతం పనులు లేక పట్ణణాలకు వలస వెళ్లే పరిస్థితి ఉందని.. పట్టణాల్లో సరైన ఉపాధి అవకాశాలు లేవన్నారు. రైతు కూలీలకు ఏడాదికి రూ.12 వేలు ఇవ్వడంతో పాటు వారి కుటుంబాలకు బీమా సౌకర్యం కల్పించాలని డిమాండ్ చేశారు. రైతు కూలీలకు ఏమైనా అయితే వారి కుటుంబాలకు ఆగమవుతాయని అన్నారు. స్థానికంగా ఉపాధి లేక జోగులాంబ గద్వాల జిల్లా అయిజ మండలానికి చెందిన 20 మంది కూలీలు పనికోసం కర్ణాటక వెళ్తుండగా ప్రమాదం జరిగి ఇద్దరు చనిపోయారని చెప్పారు. వారి కుటుంబాలకు ఆధారం లేకుండా పోయిందన్నారు. ఉపాధి హామీ పథకంలో రైతు కూలీలకు పని కల్పిస్తామని చెప్తున్నప్పటికీ కేంద్రంతో మాట్లాడకుండా అది ఎలా సాధ్యమని ప్రశ్నించారు. ఉపాధి హామీలో పని దినాలు పెంచడం కోసం ఇప్పుడు కమిటీ వేస్తే ఎప్పుడు కేంద్రానికి నివేదిక ఇస్తారని.. వాళ్లు ఎప్పుడు ఆమోదిస్తారని ప్రశ్నించారు.

యాదాద్రి పవర్ ప్లాంట్ ప్రైవేటీకరణకు కుట్ర

రాష్ట్రం ఇంత సంక్షోభం ఉంటే సీఎం తన కుటుంబానికి సంపదను దోచేపెట్టే పనిలో ఉన్నారని కవిత మండిపడ్డారు. యాదాద్రి పవర్ ప్లాంట్ లో కొన్ని కాంపొనెంట్లను ప్రైవేటీకరించి దోచుకునేందుకు కుట్ర చేస్తున్నారన్నారు. పవర్ మ్యాక్స్ అనే కంపెనీతో ముఖ్యమంత్రికి ఉన్న సంబంధాన్ని బయట పెట్టాలని డిమాండ్ చేశారు. కరెంట్ విషయంలో ప్రభుత్వానికి అధికారం ఉండాలని గతంలో మాట్లాడిన సీఎం.. ఇప్పుడు ప్రైవేటీకరణకు ఎందుకు ప్రయత్నిస్తున్నారని ప్రశ్నించారు. రైతులకు నీళ్లు, కరెంట్ ఇవ్వగలిగే పరిస్థితి ఉన్నప్పటికీ కాంగ్రెస్ ప్రభుత్వం ఇవ్వడం లేదని.. ఈ విషయాన్ని రైతులు గమనించాలని కోరారు. రాష్ట్రంలో కరెంట్ సంక్షోభం ఉంటుందని ముందే గ్రహించి తాము ప్రభుత్వాన్ని ఎప్పటికప్పుడు హెచ్చరిస్తూనే ఉన్నామని గుర్తు చేశారు. సర్ ప్లస్ కరెంట్ ఉన్న రాష్ట్రాలతో ముందే ఒప్పందం కుదుర్చుకొని ఉంటే కరెంట్ సమస్య వచ్చేది కాదన్నారు. అడుక్కుంటారో, కొనుక్కుంటారో గానీ నవంబర్ నెలాఖరు  వరకు రైతులకు ఉచిత కరెంట్ ఇవ్వాల్సిందేనని స్పష్టం చేశారు. లేదంటే బోర్లపై ఆధారపడిన రైతులు తీవ్రంగా నష్టపోయే ప్రమాదం ఉందన్నారు. కరెంట్ కష్టాలను అధిగమించేందుకు అవసరమైతే కేంద్ర మంత్రులు కిషన్ రెడ్డి, బండి సంజయ్ లను కలుస్తామని.. ఢిల్లీకి వెళ్లి కేంద్రం పెద్దలతో మాట్లాడతామని చెప్పారు. 

హైదరాబాద్ నీటి కష్టాలకు కాంగ్రెస్సే కారణం

హైదరాబాద్ లో నీటి కొరతకు కాంగ్రెస్ ప్రభుత్వమే కారణమని కవిత చెప్పారు. ఎల్ నినో ఎఫెక్ట్ తో పాటు నగరంలో పెద్ద ఎత్తున చెరువులు కబ్జా చేయటంతో నీళ్ల కష్టాలు వచ్చాయన్నారు. కాంగ్రెస్ ప్రభుత్వం అధికారంలోకి వచ్చిన తర్వాత 8 వేల చెరువులు మాయం చేశారని చెప్పారు. దీంతో నగరంలో భూగర్భ జలాలు అడుగంటాయని తెలిపారు. చెరువులను కాపాడాల్సిన హైడ్రా ఏం చేస్తుందని నిలదీశారు. కరువు బారిన పడిన రాష్ట్రాన్ని వదిలేసి తన కుటుంబానికి దోచి పెట్టేందుకు ముఖ్యమంత్రి రోజు అన్నదమ్ములతో మీటింగ్ పెడుతున్నారని ఆగ్రహం వ్యక్తం చేశారు. కుటుంబ దోపిడీకి కేటాయించిన సమయంలో కొంత రాష్ట్ర ప్రజల కోసం కేటాయించి ఉంటే ఈ కష్టాలు వచ్చేవి కావన్నారు. 

అఖిలపక్షం ఇప్పుడు గుర్తొచ్చిందా?

కరవును ఎదుర్కొనే విషయంలో పూర్తి నిర్లక్ష్యంగా వ్యవహరించిన ముఖ్యమంత్రి ఇప్పుడు మొసలి కన్నీరు కారుస్తున్నారని కవిత అన్నారు. కరువు విషయంలో అఖిలపక్ష మీటింగ్ పెడతామని అంటున్నారని కానీ దానితో ప్రయోజనం ఏముంటుందని ప్రశ్నించారు. ఈ పని ముందే చేయాల్సిందని అన్నారు. బీసీ బిల్లు విషయంలో అఖిలపక్షాన్ని ఢిల్లీకి ఎందుకు తీసుకెళ్లలేదని నిలదీశారు. అవసరమైన విషయాల్లో సైలెంట్ గా ఉండి ఇప్పుడు తాను చేసిన తప్పుకు అందరినీ భాగస్వాములు చేసే ప్రయత్నం చేస్తున్నారని మండిపడ్డారు. ఇప్పుడు అఖిలపక్షం గుర్తొచ్చిందా అంటూ మండిపడ్డారు. కవులు, కళాకారులు, ప్రతిపక్షాలు, సినిమా స్టార్లను కరవు విషయంలో ప్రభుత్వానికి అండగా నిలవాలని కోరుతున్నారని.. కానీ గతంలో వారిని ఇబ్బంది పెట్టిన సంగతి ఏమిటని ప్రశ్నించారు. కష్ట కాలంలో రైతులకు తాము అండగా ఉంటామని, వారికి తమ తరఫున చేయగలిగిన సాయం చేస్తారని చెప్పారు. అదే సమయంలో ఈ ప్రభుత్వం చేతగాని తనం కారణంగా వచ్చిన కరువు ముప్పును కూడా ప్రజలకు వివరిస్తామన్నారు. 

సొంత మనుషులపై ఉడుకు నీళ్లు పోసే నైజం కేటీఆర్ ది

విదేశీ బొగ్గు కొనుగోలు ఒప్పందాలపై విచారణ పేరుతో ప్రతిమ శ్రీనివాస్ రావుకు వ్యతిరేకంగా కేటీఆర్ లేఖ రాయడంపై కవిత ఆశ్చర్యం వ్యక్తం చేశారు. ఉద్యమకాలంలో బీఆర్ఎస్ కు పూర్తి అండగా ఉన్న శ్రీనివాస్ రావుపై విచారణ కోరడం అంటే నమ్మినోళ్లను నట్టేట ముంచడమేనన్నారు. సాయం చేసిన వాళ్లను, కుల బంధువులను ఇబ్బంది పెట్టడం.. ఇంటి మనిషినైనా తనను కిరాయి మనుషులతో తిట్టించే నైజం కేటీఆర్ ది అని మండిపడ్డారు. తెలిసి చేశాడో తెలియక చేశాడో గానీ లేఖ రాయడం ఆయన అజ్ఞానాన్ని తెలియజేస్తుందన్నారు. తెలియక చేసి ఉంటే ఆయనకు ఏమీ తెలియదని తాను చెప్పే మాటలు నిజమని.. తెలిసి చేసి ఉంటే అదే కేటీఆర్ నైజమని అన్నారు. సొంత మనుషులపై ఉడుకు నీళ్లు పోసే వ్యక్తి కేటీఆర్ అన్నారు. ప్రతిమ శ్రీనివాస్ ను సీఎం ఎందుకు కాపాడుతున్నాడని ప్రశ్నించారు. తప్పు చేస్తే ఎవరినైనా శిక్షించాలని కానీ సాయం చేసిన వాళ్లపైనే విచారణ కోరుతూ లేఖలు రాయడమే కేటీఆర్ వ్యక్తిత్వమన్నారు. సింగరేణి కార్మికుల కష్టాలేవి కేటీఆర్ కు తెలియదన్నారు. సింగరేణిలో బీఆర్ఎస్ సభ పెట్టి బల ప్రదర్శన చేయడానికి ప్రయత్నించారు తప్ప కార్మికుల కష్టాలను కనీసం ప్రస్తావించలేదన్నారు. తమ పోరాటాలతోనే ప్రభుత్వం దిగి వచ్చి సింగరేణిలో మెడికల్ బోర్డు నిర్వహిస్తుందని గుర్తు చేశారు. కార్మికుల కోసం పనిచేస్తున్న హెచ్ఎంఎస్, టీఆర్ఎస్ కూటమే సింగరేణి ఎన్నికల్లో విజయం సాధిస్తుందని ధీమా వ్యక్తం చేశారు.

The post Kalvakuntla Kavitha Slams Revanth Reddy Over Telangana Drought appeared first on Telangana Jagruthi.

ఘటనకు బాధ్యులైన పోలీసులపై అట్రాసిటీ కేసులు నమోదు చేయాలి

-తెలంగాణ రక్షణ సేన చీఫ్ కల్వకుంట్ల కవిత

(తెలంగాణ రక్షణ సేన, హైదరాబాద్) :

దళిత జర్నలిస్టులపై థర్డ్ డిగ్రీ ప్రయోగించడం ప్రజాస్వామ్యంపై దాడి అని తెలంగాణ రక్షణసేన అధ్యక్షులు కల్వకుంట్ల కవిత పేర్కొన్నారు. రాజన్న సిరిసిల్ల జిల్లా గంభీరావుపేటలో దళిత జర్నలిస్టులు పొత్తూరి శేఖర్, సంపత్ లపై థర్డ్ డిగ్రీ ప్రయోగించిన గంభీరావు పేట్ ఎస్సై శ్రీకాంత్ మీద కేసులు పెట్టి కఠిన చర్యలు తీసుకోవాలని ఆమె డిమాండ్ చేశారు. ఈ మేరకు ఆమె గురువారం “ఎక్స్” లో పోస్ట్ చేశారు. జర్నలిస్టులపై థర్డ్ డిగ్రీకి పాల్పడిన ఎస్సై సహా మిగతా పోలీసులపై ఎస్సీ, ఎస్టీ అట్రాసిటీ చట్టం కింద కేసులు నమోదు చేయాలన్నారు. ఎస్సై భూ అక్రమాలు, పంచాయతీలు, సెటిల్ మెంట్లపై వార్తలు రాస్తే అక్రమ కేసులు పెట్టి థర్డ్ డిగ్రీ ప్రయోగిస్తారా అని ప్రశ్నించారు. గంభీరావుపేట పోలీస్ స్టేషన్‌లోనే జర్నలిస్టుల నోట్లో గుడ్డలు కుక్కి, అత్యంత పాశవికంగా థర్డ్ డిగ్రీ ప్రయోగించి వారిని తీవ్రంగా హింసించారన్నారు. ఇది అత్యంత అమానుష చర్య అంటూ ఆగ్రహం వ్యక్తం చేశారు. బాధితులకు మేజిస్ట్రేట్ రిమాండ్ తిరస్కరించారంటే ఏ స్థాయిలో వారిపై పోలీసులు దాడి చేశారో అర్థం చేసుకోవచ్చన్నారు. ప్రజాస్వామ్యంలో నాలుగో స్తంభమైన మీడియాపై ఈ తరహా దాడులు ఆక్షేపణీయమన్నారు. జర్నలిస్టులపై థర్డ్ డిగ్రీ ప్రయోగించడం అత్యంత దుర్మార్గమైన చర్య అని..ఈ ఘటనకు బాధ్యుడైన గంభీరావుపేట ఎస్సైపై నామమాత్రపు చర్యలతో సరిపెట్టాలని చూస్తే అది పోలీసు వ్యవస్థకు మచ్చ తెస్తుందన్నారు. ఈ విషయంపై డీజీపీ వెంటనే స్పందించి ఎస్సైతో పాటు బాధ్యులైన వారందరిపై అట్రాసిటీ కేసులు నమోదు చేసి కఠిన చర్యలు తీసుకోవాలని డిమాండ్ చేశారు.

జర్నలిస్టులపై థర్డ్ డిగ్రీ ప్రయోగించిన రాజన్న సిరిసిల్ల జిల్లా గంభీరావుపేట ఎస్సై శ్రీకాంత్ పై శాఖాపరమైన విచారణ చేపట్టి కఠిన చర్యలు తీసుకోవాలి తన అక్రమాలను ‘‘ఏక్ దమ్ న్యూస్’’ ఎడిటర్ పొత్తూరి శేఖర్, జర్నలిస్ట్ సంపత్ బయట పెడుతున్నారని కక్షగట్టిన గంభీరావుపేట ఎస్సై శేఖర్ వారిని అక్రమంగా అదుపులోకి తీసుకొని తీవ్రంగా హింసించడంతో పాటు థర్డ్ డిగ్రీ ప్రయోగించడం అప్రజాస్వామికం ప్రజాస్వామ్యంలో నాలుగో స్తంభమైన మీడియాపై ఈ తరహా దాడులు ఆక్షేపణీయం.. జర్నలిస్టులపై థర్డ్ డిగ్రీ ప్రయోగించడం అత్యంత దుర్మార్గం ఈ ఘటనకు బాధ్యుడైన గంభీరావుపేట ఎస్సై పై నామమాత్రపు చర్యలతో సరిపెట్టడం పోలీస్ వ్యవస్థకే మంచిది కాదు.. డీజీపీ గారు వెంటనే స్పందించి ఎస్సైతో పాటు ఈ ఘటనకు బాధ్యులైన వారందరిపై కఠిన చర్యలు తీసుకోవాలి @TelanganaDGP @spsircilla

— Kavitha Kalvakuntla (@RaoKavitha) October 15, 2026

The post Kalvakuntla Kavitha demands SC/ST Atrocities Act Cases Over Alleged Third-Degree Torture of Dalit Journalists appeared first on Telangana Jagruthi.